Atuarfitsialammi atuartut kalaalisut angusaat pitsaanngillat

Atuarfitsialaap aallartinneranit, tassa 2003-mi meeqqat atualersut, siorna 2013-imi soraarummeernerisa inerneri, immikkut ittumik takussutissiipput, taama allappoq Inerisaavik. Atuartut angusaat ataatsimut isigalugu ukiuni kingullerni pitsanngoriarsimagaluartut, taamaattoq kalaallisut angusat Inerisaavimmit ernumanartutut isigineqarpoq.
Allattoq Apollo Jeremiassen
januaarip 16-at 2014 08:42

Siorna soraarummeernermi atuartut 771-it soraarummeerutaat nalunaarsorneqarput. Fagi assigiinngitsuni soraarummeernerit inerneri ilaatigut kusanartuupput aammali ajorseriarnertaqarlutik.

Atuarfitsialammi atuartut soraarummeernerisa angusaaat 2010-miit 3013-imut nalunaarsorneqartut malillugit, atuartut 2013-imi soraarummeernerminni matematikkimut aamma qallunaatut oqaluttariarsornikkut pikkorinnerulersimapput. Kalaallisut, qallunaatut allattariarsornikkut aamma tuluttut allattariarsorneq pikkoriffigineqannginnerulersimallutik.

Kalaallisut oqaluttariarsornermi atuartut 12 procentii angusarissaarlutik karakterimik A-mik aamma B-mik pissarsisimapput, 64 procent.it C-mik aamma D-mik pissarsisut. Atuartut 19 procentii E-mik angusaqaqqartut, Inerisaavimmit isumakulunnartutut oqaatigineqarpoq. Atuartut 6 procentii karakterit ajornersaannik tassa Fx-mik aamma F-mik pissarsipput.

Kalaallisut allattariarsornikkut angusat oqaluttariarsornikkut angusat assigilluinnangajappaat, taakkulu aamma isumakunnartuusut Inerisaavimmit oqaatigineqarluni.

Qallunaatut oqaluttariarsornermi angusat pitsaanerujussuupput, tassa atuartut 28 procentiisa B imaluunniit A pissarsiarimmassuk, atuartullu 56 procentiisa D imaluunniit C pissarsiaralugu. Allattariasornermili angusat pitsaannginnerupput, tamannalu Inerisaavimmit naammaginanngitsutut oqaatigineqarluni.

Tuluttut oqaluttariarsornermi atuartut 15 procentiinnai F-mit imaluunniit Fx-mik angusaqarput sinneri pitsaanermik angusaqartut. Tuluttulli allattariarsornermi angusat pitsaavallaanngillat tassa 37 procentit F-mik imaluunniit Fx-mik angusaqarmata.

Angusalli ajortuinnaanngillat. Tassa atuartut 61 procentii matematikkimi D-mik imaluunniit C-mik angusaqarput, tassa atuartut pikkorissutut oqaatigineqarlutik. Matematikkimi allattariarsornermi angusat pitsaannginnerusut Inerisaaviup maluginiarsimavaa.

Inerisaaviulli angusat ataatsimut isigalugit pitsanngoriarsimasut oqaatigaa, tassa atuartut 2010-mi pitsaannginnerpaamik angusaqartartut 2013-imi angusarissaarnerupput. 2010-mi pikkorlunnerit 38 procentiusut siorna 22 procentiinnanngorsimapput.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.

Aamma atuaruk