Atuarfinni nerisaqartitsisarneq pisariaqarluinnarpoq
- Atuartut ilaat atuarfimmi nerisaqartinneqanngikkuluarunik ulloq taanna nerisimassanngikkaluaput. Jørgen Holbæk Tasiilami Alivarpimmi pisortaq taamatut oqarpoq.
Atuarfinni nerisaqatitsinermik aaqqissuussineq ingammik Tasiilap kommunerisimasaani nuannaarutigineqarsimasoq, Ilinniartitaanermut Naalakkersuisup, Palle Christiansenip Inatsisartunut ilaasortamut, Ruth Heilmannimut, paragraf 37 atorlugu apeqquteqarsimasumut, akissummini allappoq.
Kisianni kommunini allani soqutigineqarpallaarsimanngitsoq , akissummi aamma atuarneqarsinaavoq.
Nerisaqartitsinermut siorna 2010-mi aningaasaliissutigineqartut 5 millioner 79 tusind koruuniusut taamaallaat pingasorarterutaat atorneqarsimapput.
Nerisitsisarnermut aningaasaliissutit Namminersorlutik Oqartussat kommunillu avittarpaat.
Atuarfinni nerisaqartitsisarnissamik aaqqissuusineq, Nunatta karsianiit 2008-mi aningaasalersorneqalertoq, suli naliliiffiginbeqarnikuunngilaq. Kisianni Ilinniartitaanermut Naalakkersuisup iluatsilluarsimasutut nalilerumanngilaa.
Tasiilalli taassumalu nunaqarfiini ukiuni 40-ni misilittakkat pitsaalluinnartut, atuarfiup ittuata oqaluttaraa.
Ammassallip kommunerisimasaata nerisaqartitsinermik atuutsitsinera ilutigalugu piumasaqaatit periarfissallu ilaartorsimapput. Nerisaqarnermi siunnersuisoqatigiit inassuteqaatat takkussimapput kingullertullu Nunatta Karsianiit tapiissuteqarfiginearnissamik aamma periarfissaqalerluni.
Tasiilami Alivarpimmi atuartut nerisaqartinneqarnerat pitsanngoriartortinneqarput, allanngorartinneqarlutik aammalu naatitanik nerisaqartinneqarput, taakkulu igasumik ilinniarsimasumik isumagineqartarput Jørgen Holbæk oqarpoq.
Atuarfimmi nerisaqartitsinerup kajuminnarnerulernissaa siunertaralugu, Ilinniartitaanermut Naalakkersuisoqarfiup KANUKOKA maanna oqaloqatigisarpaa.
KANUKOKA-llu siunnersuutigiumaagai aappaagu aningaasanut inatsisissatut siunnersuummi ilaatinneqassasut NAATSORSUUTIGINEQARPOQ.
Jørgen Holbækili nalorninngilaq: Tasiilami atuartut nerisaqartinnissaat SULI PISARIAQARPOQ.
Aningaasatigut periarfissaq atuuttuartillugu Namminersorlutillu Oqartussat aningaasaliisartillugit kommunilu isumaqataatillugu, uagutsinnut tamanna ajunngitsumik misigaarput, qinnuteqartassaagut periarfissarlu tamanna tapersorsorparput Tasiilami Alivarpimmi atuarfiup pisortaa Jørgen Holbæk oqarpoq.
Atuartut nerisaqartinneqarnerannut aaqqissuussineq kommunini pingasuni annikinnerusumik annertunerusumilluunniit atorneqarpoq.
Qaasuitsup kommuniata atuarfiini atuartut nerisaqartinneqarnerannut aaqqissuussineq atortinneqanngilaq.