Atuarfinni nerisaqartitsineq unitsinniarpaat
Atuarfeqarneq kommuunit isumagisassaraat, nerisaqaritsisarnerlu Namminersorlutik Oqartussanit isumagineqarluni, Atuagagdliutini ullumi saqqummersuni taamatut allaaserinnittoqarpoq.
Kommuunit ukiuni kingullerni sisamani atuartut nerisaqartinneqarnerannut aningaasanik qinnuteqarnissamut periarfissaqarsimapput. Aaqqissuussinerli iluatsippiarsimanngilaq.
Naalakkersuisut siunnersuutaat malillugu atuartut nerisaqartitsisarnerannut aningaasaliisarneq 2012-mi unitsinneqassaaq, Ilinniartitaanermut Naalakkersuisoq Palle Christiansen erseqqissaavoq.
Assersuutigalugu Qaasuitsup Kommunia isumaqarpoq, atuartut taquassaat inuit namminneq isumagisassarigaat, taamaattumillu atuartut nerisaqartinneqarnerannut aningaaliissutinik qinnuteqassanni, kommuunit allat qinnuteqartartut, Palle Christiansen Atuagagdliutini taamatut issuarneqarpoq,
2007-miillu atuartunik nerisaqartitsisarnermut aningaasaliissutit amerliartuinnarsimapput. 1 million koruuniniit ullumikkut 5,8 millionit koruunut akeqarlutik.
Perorsaanikkut eqqarsartaatsikkullu siunnersuisarfiup PPR-ip kommuuninut nuunneqarneratigut kommuunit aningaasanik amerlanerusunik tunineqartalissasut, Palle Christiansen oqarpoq.
Taava kommuunit namminneq aalajangissavaat aningaasaatitik sumut atorusunnerlugit, Palle Christiansen Atuagagdliutini ullumi saqqummersuni taamatut issuarneqarpoq.
