Atuarfinni atuartut nerisaqartarnissaat inatsisartuni

Inatsisartut upernaakkut ataatsimiinnissaanni ilaatigut atuartut atuarfimmi nerisinneqartalernissaat oqaluuserineqassaaq.

Atuartut nerisinneqartalernissaannik kissaat naalakkersuisoqatigiit isumaqatigiissutaanniippoq, aningaasanillu immikkoortitsisoqareerpoq. Aningaasat atuagassat ikippaallaaqaat, taama isumaqarpoq Jens B. Frederiksen Demokraatineersoq, taamaattumik aningaasaliissutit amerlineqarnissaat siunnersuutigaa.

Atuarfimmi nerisassat peqqinnartut iluaqutaapput! Tamanna Vejlemi misileraanikkut paasineqarpoq. Vejle-mi 8. klassimi atuartut anitsiarfissuarmi neriffiusartumi nerisassanik peqqinnartunik sassaalliiffigineqartarput qaammatillu marluk qaangiutiinnartut meeqqat aaversinnerisigut peqqinnerulersimanerat paasineqarpoq.

- Nerisavut nukissamik tunisinerusarput tiiminilu aallussilluarnarneruvoq, 14-inik ukiulik Lene Kramer Vejlemi 8. klassimi atuartuusoq taama oqarpoq. Taassuma ilaaffigai ukiap ingerlanerani misiligutigalugu ulloqeqqanut nerisassanik peqqinnartunik akeqanngitsumik sassaalliiffigineqartartut.

Misileraanermi 8. klassimi atuartut 145-t Vejlemi atuarfinnit assigiinngitsuneersut peqataatinneqarput. Atuartut marlunngorlugit avinneqarput, affaat pisarnertik malillugu taqussaminnik ulloqeqqasiortarput, affaallu nerisassanik peqqinnartunik proteineqarluartunik kulhydrateqarluartunillu sassaalliiffigineqartarput. Qaammatit marluk qaangiutiinnartut aaviinikkut paasineqarpoq atuartut peqqinnartunik nerisinneqartartut aaginnerujussuusut, saarngi nukittunerusut timaallu proteineqarnerujussuusut.

Nakorsaanerup Henrik Heyip misileraanermik ingerlatsisup taama sukkatigisumik allannguuteqartoqarnissaa ilimagisimanngikkaluarpaa.

- Qaammatit marluk ingerlaneranni taama allannguisoqarsinnaanera ilimagisimanngikkaluarpara, nakorsaaneq oqarpoq.

Atuartut misileraanermi peqataasut peqqinnerulerput aamma naak ullormut nerisartagaasa sisamararterutaannaat allanngortinneqaraluartut. Peqqinnerulersitsisut tassaapput bananit, kuloruujut, appelsiinat aalisakkallu kiisalu kukkukuuaqqat, kalkunit nersussussuaaqqallu neqaat.

- Atuartut imminnut naammagisimaarnerulerput taamalu nukissaqarnerulerlutik, qularnanngilaq tamatuma aallussilluarsinnaanerulernerat kingunerissagaa nakorsaaneq oqarpoq.

Misileraanerup ingerlaannaq atuuttussanngortinneqannginneranut pissutaavoq nerisassat peqqinnartut kikkunnit akilerneqassanersut isumaqatigiinngissutaammat. Kisianni Henrik Hey oqarpoq naalakkersuisut taamaattunut aningaasaliigunik pitsaasumik aningaasaliissagaluartut.

- Tassami taamaaliornikkut siunissami sukkorneq, saanikkut nappaatit assigisaalu pinngitsoorneqarsinnaassagaluarput, Henrik Hey oqarpoq.

Nunatsinni atuartut nerisarnerat Inatsisartuni marsip 16-anni oqaluuserineqassaaq.