Atuarfimmut taquartarneq ilikkagaqarnissamut iluaqutaavoq

TV-mi igasup Jamie Oliverip atuarfimmi nerisarineqartartut pillugit aallakaatitassiaanut meeqqat malinnaasimasut misissuisut malinnaaffigisimavaat.

Jamie Oliver suliaminik iluatsitsivoq.

Atuakkiortarnermigut tv-miittarnermigullu ukiunilu kingullerni sisamani Tuluit Nunaanni atuarfimmi nerisassiornermik ajoqersuussisarnermigut iluatsitsivoq.

Jamie Oliverip nerisassiat kissaannarissat atuarfimmi nerineqartarnerat unitsinniarpaa, aalisakkanik naatitanillu nerisaqartitsinerulerluni.

Tamannalu meeqqat ilikkarsinnaanerannut ajunngitsumik sunniuteqartoq Esseximi ilisimatusarfiup misissuisitsinerata ersersippaa.

Meeqqat Londonip kangisinnerusortaani Greenwichimi atuartut 13.000-it, ukiuni arlalinngortuni Jamie Oliver-ip nerisassatut innersuussutaanik nerisaqarsimasut, ilisimatusartunit malinnaavigineqarput.

Misissuisut paasivaat meeqqat, Tuluit Nunaanni meeqqanut allanut sanilliullutik, naammassinnissinnaanertik procentinik arfineq-pingasunik pitsaanerulersissimagaat, ilanngullugulu napparsimallutik atuanngitsoortarnitik procentinik 15-inik annikillisissimagaat.

Nalunaarusioqataasoq, Michel Ballot, aviisersuarmut Sunday Timesimut oqarpoq meeqqanut allannguutaasut taama pilertortigisumik saqqummersimanerat tupaallaatigalugu Jamie Oliverillu nerisassiaanik nerisarsimanerat kisiat nassuiaatissatut isigalugu.

Nerisassiat atuarfimmut taquarineqartartunit saviminissartaqarnerunerat iluaqutaasimassangatippaa taannami ineriartornermut ukkissisinnaanermullu iluaqutaasarmat.

Meeqqat ilaat illiguppallaartanngikkaluartut Jamie Oliver tanngassimaarutissaqarpoq.