Atuarfimmi pisortaasimasoq: Namminersorneq atuartunut sapiinnerulersitsivoq

Johanne Olsen-ip ukiuni 33-ini sulereerluni kingumut qiviarluni oqaatigaa atuarfeqarnerup tungaatigut ineriartorneqarsimaqisoq.

- Ilinniartitsisutut aallarteqqaarama meeqqat atuarfianni atuarneq sivisunerujussuusarnikuuvoq, børnehaveklasseqarpugut, taavalu aamma 11. klassit ilaatigullu amerlasoorpassuarni 12. klasseqarluni.

Maannakkulli tassa 1. klassioriarlutik 10. klassi ilanngullugu tassa meqqat atuarfianni naammassisalerput. Kisiannili ilikkagassatigut ukiuni makkunani ilikkarneqarsinnaasut periarfissat annertunerujussuupput. Taamanikkut aamma soorlu kalaallisut atuakkiat atuarfimmi atugassat ikinneerarsuupput, ukiuni makkunani naqitertakkat atuartitsinermi atorneqarsinnaasut amerlasoorujussuanngornikuullutik.

Sutigut tamatigut namminneerlutik atuartut aamma ilikkagassaminnik ujarlersinnaanerat annertunerujussuanngornikuuvoq, taavalu namminneerlutik avataaninngaaniit sunnerneqarnerminni ilikkarfissaasinnaasut ullutsinni annertoorussuanngornikuupput, qarasaasiaq aqqutigalugu aammalu aviisitigut fjernsynikkut ilikkagassat, sammisassat annertoorujussuupput, taavalu aamma atuartut malinnaaffigisinnaaneri annertunerullutik, Johannes Olsen oqarpoq.

Taassuma ilanngullugu maluginiarsimavaa Namminersornermut taasinerup atuartunut naammassisaqarusunnerulersitsimasutut:

- Atuartut amerlanerparujussit atuarfimmi naammassigaangata piareersimasutut nalilertarpavut, aamma namminersornermut taasinerup atuartut inuiaqatigiinnut iluaqutaasumik anguniaqarneranni piumassuseqarnerulersippai ilinniagaqarnissamullu sapiissuseqarnerulersillugit, Johanne Olsen naggasiivoq.