Atuarfik Mathias Storch millisinnagu

Tamatumunngalu atatillugu Qaasuitsup Kommuniani Demokraatit, Atuarfik Mathias Storch sanaqqinnissaanut atatillugu annikillilerniarnera pissusissamisuunngitsutut isigivaat.

-Inuiaqatigiit aningaasaataannik atuissagutta kingumut isiginani, siumut isigaluni sanaartornerit taamaattut aningaasartalissuit ingerlanneqartariaqartut isumaqarpunga, Ane Lone Bagger oqarpoq.

Atuarfik Mathias Stochip sanaartoqqinnissaanut atatillugu annikillilerniarneqarnerani meeqqat ukiut kingullertigut ikilisimanerinik tunngavilersuutigineqarpoq.

Qaasuitsup Kommuniani Demokraatit taamatut aalajangerneq isumaqatiginngilaat, isumaqarpullu  Ilulissat ukiualuit ingerlanerini alliartoqqipiluussasoq.

Ilulissani innuttaasut amerlinissaannut pissutaasut arlaqarput. Takornariaqarnerup ulluni makkunani annertusisimanera, mittarfiup allilerneqarnissaanut sulisut amerlineranni Ilulissanut nuuttussat amerlisussaanerat, aamma Perorsaanermik Ilinniarfiup allinissaanut pilersaaruteqartoqarmat, taamaattumik tamakkua malitsigalugit ilaqutariit meerartallit illoqarfimmut nuussornissaat Qaasuitsup Kommuniani Demokraatit ilimagaat.

Qaasuitsup Kommuniani Demokraatini siulittaasoq Ane Lone Bagger isumaqarpoq atuarfik annikillisinneqarpat siunissami meeqqat tattorliuutilissasut.

- Tunngavilersuutigut aallaavigalugit  siunissami atuarfik naammassiinnartorlu meeqqat tattulereertussaassavaat, Ane Lone Bagger naggasiivoq.

Taanna aamma isumaqarpoq Ilulissat ungasinngitsukkut inukillinani innuttaqarnerulissasoq.