Atuarfiit 14-it asbestimik akulimmik sanaajupput

KNR-imi misissuinerit aallaavigalugit upernaaq paasinarsisipparput atuarfiit sorliit asbestimik akulinnik sanaajunersut pisortatigoortumik ilisimaneqanngitsoq.

Taamaammat titartagatoqqat avataaniit ikiortilerluni Ineqarnermut Pisortaqarfimmi misissuiffigineqarput.

Misissuinerit kingunerisaanik Ineqarnermut Pisortaqarfimmiit maanna paasineqarpoq, illoqarfinni pingasuni, tassalu Ilulissani, Narsami kiisalu Kangaatsiami atuarfiit asbestimik akulimmik sanaajusut, taakkua saniatigut nunaqarfiit aqqanillit aamma asbestitalinnik sanaajusut titartakkani takuneqarsinnaavoq.

Pisortatigoortumilli ilisimaneqanngilaq titartakkat taakkua malillugit ilumut atuarfiit maannamut nutarteriffigineqarnatik taamaaginnarnersut.

Tassa atuarfiit nutarterneqarlutik asbestitaat piiarneqarsimanersut ilisimaneqanngilaq.

Paasisat aallaavigalugit Ineqarnermut Pisortaqarfimmiit qanoq suleriartoqaqqissanersoq apeqqutigigatsigu, allaffimmi pisortaq, Niels Petersen ima oqarpoq:

-Nunaqarfinni imaluunniit illoqarfinni kommunet teknikkikkut allattoqarfii takusaatissavagut assiliitillugillu, piiarlugilli misissornagit isaannarmik takuniarlugit misissuitinniarpagut.

Qaqugumita tamanna pissava?

Tassa ulluni qaninnerni pilersaarusiukannissarvarput saaffigiortorlugillu kommunet, Niels Petersen oqarpoq.

Taassuma aamma erseqqissaatigaa titartakkat ilaanni asbest atuarfiit silataannaanni atorneqartarsimasoq. Oqarporlu atuarfiit iluarsartuussagassatut ukiup tulliani aningaasanut inatsimmi suliassatut aalajangiutereersimasut paasisat nutaat tulleriiaarneqarnerinut allannguiffiunavianngitsut, aatsaallu siusinnerpaamik 2009-mi aningaasanut inatsimmi atuarfiit iluarsartugassat tulleriiaarnerinut paasisat nutaat sunniuteqarsinnaasut, Niels Petersenip ilimaginerarpaa.

Politikerillu kisimik naggataatigut aalajangiisuussaapput atuarfiit sorliit nutarteqqaarneqarnissaannut.