Atuakkiortunngorusuttut siunissamut sapiissuseqartut
Bootcampimi Kangerlussuarmi ingerlanneqartumi arnat arfineq pingasut angutillu marluk peqataapput. Oqaaserlu bootcamp timitalerneqarpoq, barakkimi pikkorissartut najugaqarfigisaat iseraanni illup equngarnera takuneqarsinnaavoq. Atuakkiortut marluk, Mette Moestrup aamma Jessie Kleemann, pikkorissaasuupput, pikkorissagaallu atuakkiortuussagaanni suut ilisimasariaqarnersut qanorlu iliortoqartariaqarnersoq ilinniarpaat.
-Peqataasut nammineq oqaluttualiaaqqatit aallavigaat, pikkorissarnerullu ingerlanerani suliaqangaatsiarput. Ilitsersuisoqareermat allanngortitassat allanngortinneqarput, ilaqqilaagassallu ilaneqarlutik. Bootcampi ingerlanneqarnera ataatsimut isigissagaanni peqataasut ilinniarusussuseqarnerat ineriartornerallu assut kajumilersitsivoq, Katja Vahl, NAPA-mi paasissutissiisartoq, oqaluttualiaaqqanik unammisitsinermi Allattami aaqqissueqataasimasoq oqarpoq.
Peqataasut sinerissap annersaaneersuupput, avannaani Upernavimmit kujataani Nanortalimmit, peqataasut aamma ukiumikkut assigiinngisitaartupilussuupput. Peqataasut ilaat unammisitsinermut peqataanermikkut siullerpaamik oqaluttuaaraliorput, allallu oqaluttuaaraliornermik misilittagaqarnerullutik. Unammisitsinerup ukioq ataaseq allortarlugu ingerlanneqartarnissaa siunertaavoq, suliniutillu ingerlanerani nunatsinni kommunit aningaasatigut tapersiiniarlutik aamma peqataalersimapput.
-Peqataasut maannakkorpiaq suliatik nutartikkat nassiussuullugit aallartereerput, pilersaarutillu ingerlalluassappata atuagaq oqaluttuaaqqanik qulinik imaqartoq aasamut saqqummertussaavoq. Mette Moestrupip kalaallisut oqaluttuunnginnera pissutigalugu bootcampip aallartinnginnerani oqaluttualiaaqqat tamaasa danskisuunngortillugit nutsertippagut, pikkorissaasullu marluusut peqataasunik atuakkiortunngornissamut ikiuinissaminnut tamakkiisumik toqqammavissaqarluarsimallutik, Katja Vahl knr.gl-imut oqarpoq.
