Atuakkiortoq: Tapiisinnaanissaq pisariaqarpoq
Nunatsinni atuakkanik saqqummersitsisarfiit maanna ikittuinnaasut ilaasa Radioaviisimut oqaatigaat kalaallisut atuakkiat ikippallaartut aammalu saqqummersinneqartartut atuakkioriaaseq ataasiinnaavallaaq kalaallinit atorneqarpallaartoq.
- Apeqqutaavoq amigaatitut taassallugu iluarnersoq, piffissap sivisuallaanngitsup iluani atuakkat arlalinnguit saqqummerput, taamaattumik qanoq pisiariumaneqartiginerat apeqqutaasussaavoq, Nunatsinni Atuakkiortut siulittaasuat Hans Anthon Lynge taama oqarpoq.
Inger Hauge atuakkanik saqqummersitsisartoq radioaviisimut oqarpoq inuusuttunit atuakkiortunit nassinneqarneq ajorluni, tamannalu qamuuna annerisarlugu oqaatigalugu.
Hans Anthon Lynge oqarpoq qaammatit tamarmuinnagajaasa inuusuttunit saaffigineqartarluni atuakkiorusukkaluartunit.
- Oktobarip ingerlanerani saaffiginnittut pingasuupput, taannalu nunatta inuttussusianut naleqqiukkaanni ikinngillat, tassa atuakkiortoqarusukkaluarpoq, kisianni apeqqutigiuaannarpaat 'qanormi iliussaanga saqqummersikkumallugit', Hans Anthon Lynge oqarpoq.
Ukiut ingerlaneranni atuakkanik saqqummersitsisarfiit ikittuarakasinngorsimapput, saqqummersitsisarfiit namminersortunit maanna ingerlanneqarnerupput, Inger Hauge taakkununnga ilaalluni. Taassuma oqaatigaa atuakkanik kalaallisuunik saqqummersitsisannginnerup ilaatigut kingunerisinnaangaa kalaallit oqaatsitta tammariartulernerat.
Hans Anthon Lynge tamatumunnga ima oqarpoq:
- Iluarnerusumik angusaqarsinnaaneq eqqarsaatigigaanni aamma kalaallisut oqaatsit illersorniaraanni tapiisinnaanissaq pisariaqarpoq, Hans Anthon Lyngep taama oqarnerminut pivaa oqartussat aningaasaleeqataanermikkut ikiuulluarsinnaanerat. Hans Anthon Lynge aamma oqarpoq kalaallisut oqaatsivut qanga nunasiaataanerup nalaani pingaartinneqarneqaqisut, tamannalu ilinniarfigisariaqaripput.
- Uagut aamma nalitsinni pingaartissagutsigu pisariaqassagunarpoq ilinnarfigissallugu, taamaanngippat oqaatsinik iluatissarneq aamma oqaatsit ataannarnissannik eqqarsarneq annerusumik piviusunngornavianngilaq, oqaatsillu annilaanganartorsiornerat suli alliartuinnassalluni, Peqatigiiffimmi Kalaallit Atuakkiortuni siullittaasoq, Hans Anthon Lynge, taama oqarpoq.
