Atuakkiortoq: Mobil atorlugu atuffassineq periarfissaavoq
Kalaallit oqaasii ullumikkut navianartorsiortinneqanngillat. Kisianni ukiut 50-it qaangiuppata suli ikinnerusut kalaallisut oqalussinnaanissaat ernumagisinnaavarput, aviisip Sermitsiap nittartagaa, Qapummi aallakaatitassiamut taama issuaavoq. Oqaatigineqarporlu teknologi mutiusoq atorlugu kalaallit oqaasiisa siammarterneqarsinnaaneranut atuakkiortut maanna periarfissanik misissuisut.
Soorluttaaq nunani allani atorneqalereersutut atuakkanik cd-mut immiussinerit, cd atuakkamut ilanngunneqartarluni.
- Taamalu aamma mobili kikkulluunniit pigilermassuk periarfissaq taanna soormi aamma atoruni. Tassami amerlaqisut mobilertik atorlugu nipilersuutinik tusarnaartarput, aamma tusarnaarutit siutinut ikkuttartut atorneqartarlutik.
- Atuisartut normumut aalajangersimasumut sianerlutik atuffatitissinnaanerannut teknikkikkut periarfissaqareerpoq, taama oqarpoq atuakkiortoq Aqqaluk Lynge aamma Kalaallit Atuakkiortut siulersuisuini ilaasortaasoq.
Erseqqissaassutigaali teknologi atulersinnaatinnginnerani piginnittussaatitaanermut tunngasut aaqqeqqaartariaqartut.
- Maanna kalaallisut atuakkanik saqqummersinneqartartut ikiliartortillugit qanoq iliuuseqartariaqarpugut. UNESCO-p ukioq 2008 oqaatsit ukiuattut suaarutigaa. Kalaallit oqaasii nukittorsarniarlugit periarfissaq tamanna atorluartariaqarparput, Aqqaluk Lynge Qapummut ilaatigut taama oqarpoq.
