Atuakkiortoq: Danskit Kalaallit Nunaanni pissutsinik ilisimasakippallaaqaat
- Sunniuteqarsimanera qularutissaanngilaq, taamaattorli aallakaatitassiat Kalaallit Nunaannut tunngasut ikippallaarnerujussuat ajornartorsiutaasarpoq. Tassami aallakaatitassiamik taamaattumik takkuttoqatuaraangat, inunnit soqutigineqarluartarpoq. Ingammik aallakaatitassiap uuma annilaarnartunik ilaqarnera pissutigalugu.
- Assersuutigalugu piffissami tamatumani Kalaallit Nunaannut tunngasunik qulinik aallakaatitassiortoqarsimasuuppat, taava taanna aallakaatitassianut taakkununnga ilaaginnarsimassagaluarpoq, unali aallakaatitassiaq ukiuni tallimani Kalaallit Nunaat pillugu aallakaatitassiani anginerusuni kisiartaavoq, tamannalu ajornartorsiutaavoq. Tassa qallunaat Kalaallit Nunaat pillugu annerusumik paasisaqarusukkaluarput, aallakaatitassialli taamaattut ikippallaarujussuaqaat.
- Taamaattorli isumaqarpunga, maanna 2008-miitilluta, Kalaallillu inuiaqatigiiummata nutaaliat, taava isornartorsiorneqarneq Kalaallit Nunaata sungiuttariaqaraa.
- Kisianni nuanniillisarpoq suna tamarmi isornartorsiuininngoraangat, soorlu Kalaallit Nunaat pillugu tusagassiuineq tamarmi isornartorsiuininngoraangat, Marianne Krog Andersen naggasiivoq.
Tv-kkut isiginnaagassiaq danskit Kalaallit Nunaannik isiginninnerannut sunniuteqarsimaqaaq. Maanna takutinneqarneranit ukioq ataaseq qaangiussimalerpoq, takutinniagaali danskinit suli eqqaamaneqarluartoq, Danmarkimi Kalaallit Nunaata Sinniisoqarfiani pisortaq Tove Søvndahl Pedersen oqarpoq.
- Aallakaatitassiap qallunaat kalaallinut isiginnittaasiat malunnartumik sunnersimavaa, aallakaatitassiami meeqqanik sumiginnangaasartutut isikkoqalersinneqarpugut. Aamma qallunaat isumaqarput atuarfigut ajortorujussuusut taavalu qinikkat namminneq iluanaarniapiluinnarlutik inuusut, Tove Søvndahl Pedersen oqarpoq.
Tv-kkut isiginnaagassiamik piviusulersaarummik filmiliortut ilaannik apersuineq unnugu sammissavarput, annerusumillu tusagaqarusuttunut oqaatigisinnaavarput, aqagu qallunaatut aallakaatitsisoqassammat taaguutilimmik “Året efter Flugten fra Grønland”.
