Atuakkiorfik atuakkanik kalaallisuunik saqqummersitsisarunnaarpoq
Pisassutaasut ilaattut assersuutissaavoq kulturimut naalakkersuisoqarfiup tapiissutinik 1,2 millioni koruuninik ukioq manna agguaanermini Atuakkiorfik, atuakkiassanut sisamanut tapersimammagu, 340.000 koruuninik nalilinnik, taakkulu naammanngitsut, pisortaq Nukaraq Eugenius oqarpoq.
Atuakkiorfiup aamma meeqqat atuakkerituut klubbiat Anders Andip Kammai siorna matuinnartariaqarnikuuaa, soorluttaaq Pisiffik aqqutigalugu nioqquteqartarneq qangali uninnikuusoq aamma KNI Pilersuisoq aqqutigalugu atuakkanik tuniniaaneq uninngasutut oqaatigisariaqartoq, Nukaraq Eugenius nangippoq.
Atuarfinnut ilinniarfinnullu atuakkanik tunisat ikiliartuinnartut oqaatigaat, tamatumunnga atuakkanik kopeeriinnarnerujussuaq ilaatigut pissutaanerarneqarluni.
Pisortat ingerlataat Atuakkiorfik A/S 2005-imi aasaagaa namminersortunit pigineqalerpoq, Toornaq Consulting ApS-imit pigineqalerluni. Taamani kiffartuussinermut isumaqatigiissuteqarneq atuuppoq, ukiumut 900.000 koruuninik naleqartumik. Taannali aamma Namminersornerullutik Oqartussat 2006-imi atorunnaarsippaat, taamaalilluni kalaallisut atuakkanik saqqummersitsiniarneq ajornarnerulersillugu.
Atuakkanik qallunaatuunik saqqummersitsinikkut akilersinnaasumik ingerlatsisoqarsinnaagaluarpoq, kalaallisuullu siuarsaaqataaffiginissaat siunertaajuarsimammat periarfissatut tamanna Atuakkiorfiup isiginngilaa.
- Taamaattumik atuakkanik kalaallisuunik saqqummersitsisarnerput, imminut akilersinnaajunnaavimmat, tassunga killeqartittariaqalerparput. Atuakkiorfik aqqutigalugu aamma atuakkanik pisiniarneq ajornarsissaaq, Nukaraq Eugenius naggasiivoq.
Atuakkiorfik ukiuni 50-ini atuakkanik suliaqartareerluni suliaminik unitsitsivinnianngilaq, aatsaalli saqqummersitsisassaaq saqqummersitserusuttut aningaasartuutit tamakkerlugit matussusersinnagaangatigik.
