Atuakkianut ullumi nersornaasiisoqassaaq
Nersornaasiisarneq ukioq allortarlugu pisarpoq, sisamassaalu ukioq manna nersornaasiisoqassaaq. Savalimmiuniit, Kalaallit Nunatsinniit Islandimiillu juullip qaammataani naliliisoqartarpoq, kikkut nersornaaserneqassanersut. Nunani Killerni dommerit atuakkiortoq sorleq nersornaaserneqassanersoq aalajangertarpaat, nersornaallu aappaagu 2008-mi aggustip qaammataani tunniunneqartussaassaaq.
Nunat Avannarliit Killiit taamatut nersornaasiisarnerini siunertaq tassaavoq Nunani Avannarlerni Killerni atuakkiorneq atuakkiortullu tapersersorneqarnissaat, afuakkiortummi piginnaaneqarnerisa atorluarneqarnissaat pisariaqartinneqarmat, pingaartumik meeqqanut inuusuttunullu. Aamma ersersinniarneqarpoq, Nunat Killiit Avannarliit ataqatigiimmata.
Kalaallit Nunaanni naliliisartut tassaapput Vera-Lise Rosing Olsen, Varste Mathæussen Berndtsson aamma Erika Nielsen Baadh, kikkullu nersornaaserneqassanersut nalunaaquttap akunneri marlussuit qaangiuppata paasissavarput.
