Atuakkat katersukkat Ilisimatusarfimmut tunniunneqarput
Ilisimatuup Jørgen Rischelip atuakkat Nunatsinnut tunngasut katersugai matumani pineqarput, nammineq kissaatigisaa naapertorlugu, toqunerata kingornagut Ilisimatusarfimmut tunniunneqarput.
Allattoq Elisa Isaksen
decembarip 15-at 2009 07:49
Jørgen Rischel Nunatsinni ilisimatusarnermut atatillugu ilisimaneqarluartut ilagaat, pingartumik oqaatsit ilisimatusarfigineqarnerannut atatillugu.
Katersukkat, tassaasut atuakkat 327-t, aamma mikrofilmit 13-it, Jørgen Rischelip oqaatsinik ilisimatusarnermut ilisimasaqarnerujussuanik ersersitsisuupput, ilaatigut kulturikkut oqaluttuarisaanermik ilisimatusarnermi eriagisariaqartut.
Erlinnartuutit tamakku Ilisimatusarfiup atuagaateqarfiani atuakkat eriagisariaqartut allat akornanniilissapput.
Ilisimatusarfiup pisortaata Tine Parsip, atuakkat katersukkat imaannaanngitsut taakkua pigineqalernerat tulluusimaarutigaa, atuakkallu Ilisimatusarfimmi ilinniartunit ilinniartitsisunillu atorluarneqarnissaa aamma neriuutigaa.
