Atuakkanik saqqummersitsisarfik atuakkanik qarasaasiarmiunik saqqummersitsivoq
Atuakkat tallimat aallaqqaasiutigalugit saqqummersinneqarput, tassalu Juaaka Lyberthip atuakkiaata Naleqqusseruttortut danskisuunngortinnera, Hans Jakob Helmsip atuakkiaa Arsarnernut uinngiarsukkuit, kalaallisut danskisullu, kiisalu Ole G. Jensenip atuakkiaa Glimt af Grønlands Kultur, danskisut tuluttullu.
Tullertut saqqummersinneqartussaq tassaavoq Juaaka Lyberthip atuakkiaata Naleqqusseruttortut kalaallisoortaa.
Atuakkat atuagaarniarfiit nittartagaanni pisiarineqarsinnaapput qarasaasiamullu qarasaasiaaqqamulluunniit (tablet) nuunneqarsinnaassallutik.
Atuakkanik saqqummersitsisarfiup pisortaata Lene Therkildsenip atuakkat qarasaasiarmiut nunatsinnut tulluartuunerarpai.
- Amerliartuinnartummi internettimut attaveqarput, internettimullu akigitinneqartut apparaluttuinnarlutik, Lene Therkildsen oqarpoq.
Miliup atuakkanik saqqummersitani nutaat tamaasa aammalu siornatigut saqqummersereersimasani qarasaasiarmiunngorlugit saqqummersittalerniarlugit pilersaarutigaa.