Atuakkamut assortuussutaasumut inerteqquteqartoqassanngilaq
Sakkutuut atorfinitsinneqarneranniilli paasissutissat kimulluunniit oqaatigisussaanngisaat pillugit allassimasumik ersarissumik peqartoqartariaqarpoq, taama isumaqarpoq Venstret illersornissamut oqaaseqartartuat Carsten Nonbo.
Sakkutuut immikkut sungiusarsimasut inuupput pikkorilluinnartut assigiinngitsunik piginnaasaqartut aammalu akunnerminni imminnut ilinniarfigalutik ineriartorsimasut, piginnaasallu akunnerminniiginnartittusaagaluarpaat. Taamaaliorsinnaanngikkunillu taava suna pillugu sakkutuunngorsimanertik paasinngisaannarsimassavaat.
Sakkutuut immikkut ilinniarsimasut ullumikkut nipangiusimannittussaatitaapput. Carsten Nonboli suli annertunerusunik piumasaqaateqarumavoq.
Manuskriptiliornissaminnut akuerineqaqqaarsimanngikkunik sakkutuujunerminni qanoq inuusimanertik pillugu oqalugiarnernik ingerlatsisannginnissamik, aammalu atuakkianik, filmilianik assilisanilluunniit saqqummiussisannginnissamik atorfinitsinneqarnerminni atsiortinneqartarnissaat pisariaqartoq ajoraluartumik oqaatigisariaqarunarpoq.
Sakkutuut atorfinitsinneqartarneranni maleruagassat maannakkut atuuttut ajorisassaanngitsut Socialdemokratit nunanut allanut tunngasunut oqaaseqartartuat, Mogens Lykketoft, isumaqarpoq.
Illersornissamulli qullersaqarfik eqeersimaanerusariaqartoq isumaqarpoq, suliammi matuma tamanna takussuserpaa.
Tamanna siusissukkulli oqaluuserineqarsimasariaqaraluarpoq, atuakkiortumullu pineqartumut paasissutissat sorliit sillimaniarnermik navianartorsiortitsisinnaasutut isigineqartut immikkut erseqqissaassutigineqarsimasariaqaraluarput, taamaaliortoqarsimagaluarpat ilimagilluinnarpara taakku malissimassagaluarai, Mogens Lykketoft oqarpoq.
