Atuagaq USA-mi saqqummersinneqarusunngilaq
Amerikami atuakkanik saqqummersitsisarfiit atuakkamik saqqummersitsinermikkut muuamaakkormiut sorsukkumatuut peqqarniisaarniarnissaat annilaanngatigaat.
Atuagaq Danmarkimi Muuamaamik illaruaatissiilluni titartakkat kingunipiluinut tunngasoq, Jyllands-Postenip kulturimut tunngasunik aaqqissuisuata Flemming Rose-p maanna allaleruttorpaa, saqqummersinnissaanullu atatillugu USA-mi atuakkanik saqqummersitsisarfiit attavigisimallugit, tamaasali itigarfigalugit.
- USA-mi suliarput soqutigaat, saqqummersitsinerulli kingunissai ersissutigalugit, Flemming Rose oqarpoq.
Saqqummersitsisarfiit sunilluunniit Muuamaamut tunngassutilinnik saqqummersitsinissartik aarlerinartoqartippaat. Soorlu saqqummersitsisarfiit ilaata Random House-p Muuamaap nulia meeraq pillugu atuakkiaq saqqummersikkumajunnaaraa, saqqummersinneqarpat peqqarniisaarniarnermik kinguneqaannarnissaa ersissutigalugu. Atuakkiortoq nunami allami saqqummersitsisussarsiulereerpoq.