Atuagaq nutaaq: Nammineq annoraaliorit
Europamiut niuerniat annoraaminernik niueruteqarlutik Nunatsinnut tikittalermatali annoraaq Nunatsinni atorneqalerpoq.
Nammineq annoraaliornissamut ilitsersuutitalimmik atuakkamik maanna saqqummersitsisoqartussanngorpoq.
Mersortartoq atisanillu ilusilersuisartoq Maren Clasen Poulsen, saqqummersitsisarfik Milik Publishing aqqutigalugu atuakkamik "Nammineq annoraaliorit"-mik taaguutilimmik saqqummersitsisuuvoq. Atuagaq nammineerluni annoraaliornissamut ilitsersuutissanik peqqissaartunik imaqarpoq.
DVD-taqarpoq
Annoraamik kusanartumik mersornissamut assitaliussat atorlugit ilitsersuuteqarpoq, aammattaaq DVD atuakkamut tapiliussaq isiginnaarlugu annoraaliortoqarsinnaavoq.
Atuagaq angissutsinut tamanut aamma ilisserutitaqarpoq, naalungiarsuit annoraassaannit X-large angullugu.
Atuagaq tallimanngorpat februaarip 19-iani saqqummersinneqassaaq. Nuummiikkaannilu annoraanik takutitsinermut orniguttoqarsinnaavoq, tamannalu Nuuk Centerimi tallimanngorpat nalunaaqutaq 16.30 pissaaq, annoraanillu nuannarisaqartut takkunnissaannut kaammattorneqarput annoraani kusanarnerpaaq toqqarneqassammat.