Atuagaq kalaallit qangaanerusoq oqaluttuassartaannik imalik saqqummerpoq
Atuagaq kalaallit qangaanerusoq oqaluttuassartaannik ataatsimoortumik allaaserinnittoq pernaammik saqqummerpoq.
Atuagaq ”Kalaallit Nunaata qangaanerusoq oqaluttuassartaa”-ni pineqarpoq ukiut 4.500-it matuma siornatigut taamani piniartut issittormiut avannarparnerpaanngorsimanerat – 1900-kkut missaat tikillugu, tamatumani Tunumiut kingulliit oqaluttuarisaanermut nutaanerusumut ilanngullutik.
Taamatuttaaq ukiut untritilikkuutaat oqaluttuarineqarput, taamani ukiuni akullerni naasorissaasut nunasiartortut nunap kujataa tigusarimmassuk taamalu nunatsinnut Europamiut soqutiginnilernerat tunngavilerlugu.
Atuakkamittaaq 1800-kkut tikillugit ineriartorsimaneq allaaserineqarpoq, Europamiut ilisimasassarsiortut, arfanniat ajoqersuiartortitallu kalaallinut inuiaqatigiinnut sunniuteqalermata.
Atuagaq aammattaaq Kalaallit Nunaata qangaanerusoq oqaluttuassartaata tamarmiusup qanganisarsiuutut aammalu inuiaqatigiiussutsimik ilisimatusarnikkut takussutissiorneranik imaqarpoq.
Namminersornerullutik Oqartussat atuakkanut ilinniutinut naqiterisitsiviata Ilinniusiorfiup, KIIIP-ip suliniuteqarneratigut atuagaq kalaallisut suliaritippaa.
Taamaalilluni atuakkap naleqassusermik alutornassutsimillu nalunaaruteqarnera maanna atuartartunit kalaallisut oqaasilinnit pissarsiarineqarsinnaalerpoq. Atuagaq Nunatta Katersugaasiviata Allagaateqarfiatalu januaarip ulluisa tallimaanni 2007-mi ilasseqatigiissitsinerani saqqummersinneqassaaq.
