Atuagaq "Kalaallit Nunaanni Meeqqat" saqqummerpoq
Ilaqutariinnermut Peqqissutsimullu Naalakkersuisoqarfiup Danmarkimi atugarissaassutsimik misissuisartoqatigiit SFI - Det nationale forskningscenter for velfærd – suleqatigalugu Meeqqat atugaat pillugit misissuisitsinerata takutippaa meeqqat sumiginnaasarnerannut pissutaagajuttut tassaasut: Angajoqqaat imigassanik ikiaroornartunillu atornerluivallaartarnerat, angerlarsimaffimmi annersaattoqartarnera, kinguaassiuutitigut atornerluisoqartarnera atuarfimmilu qinngasaarisoqartarnera.
Else Christensen, atugarissaarneq pillugu misissuisarfimmi SFI-mi seniorforskeritut atorfilik ima nassuiaavoq.
- Misissuisalerattali toqqaannartumik angajoqqaanik aatsaavissuaq apersuivugut. Misigisimavugut suliarput tutsuiginassuseqarnerusoq allannguinissamullu tunngaviussappat nakuussutaassasoq, nassuiaavoq.
Meeqqat ukioqanngitsuniit 14-inut ukiullit atugaasa misissornerini anaanaasup apersorneqarnissaa toqqarneqarsimavoq, nalinginnaasumik anaanat meeqqaminnut qaninnerusarmata meeqqallu ukiukitsut apersoruminaassinnaasarmata.
Misissuinerup aamma takutippaa sumiginnagaallutik alliartortut akornanni, meeqqat sisamaagaangata ataaseq imigassartorfiusumi, meeqqallu arfineq-pingasuugaangata ataaseq ikiaroornartorfiusumi peroriartortartut.
Anaanaasut 5 procentiisa aamma oqaatigaat, meeqqamik kinguaassiuutitigut atornerlunneqarsimasinnaanera pasitsaassimagitsik ilisimalluguluunniit. Peqatigitillugu anaanaasut pingajorarterutaasa oqaatigaat namminneq meeraanerminni atornerlugaasimallutik.
Taamaattoqarnera Else Christensenip upperinngeqqaarsimagaluarpaa.
- Aap, kisianni tassa misissuinerup takutippaa anaanat pingasuugaangata ataaseq atornerlugaasimasuusartoq. Paasillugu tupannarpoq, kisianni tassa Peter Bjerregaardip, Issittumi peqqissutsimik misissuisartup, siornatigut nalunaarusiaani taanna ersereerpoq, oqarpoq.
Misissuinerup aamma takutippaa meeqqat affaasa atuarnerat naammagineqanngitsoq, allaallu 8 procentii atuaqatiminnut attaveqanngilluinnartuusut.
- Ilarpassuisa atuarnertik nuannarinngilaat, qinngasaartittarput allanullu attaveqarpiartarnatik. Nukappiaraanerupput taama ajornartorsiortut, pingajorarterutaami atuagarsornikkut naammattumik ilikkagaqarneq ajorput, Else Christensen oqarpoq.
Atuarfimmi naammattumik angusaqarsimannginneq kingusinnerusukkut ilinniagaqalernissamut aporfiit annersarigaat aamma oqaatigaa.
Meeqqat sinerissami tamarmeersut 1.160-it misissuinermi akuupput. Apeqqutit kalaallinit suliat apersugassatut toqqakkat akornanni 90 procentiisa akiortorsimavaat.
Naalakkersuisut misissuisitsinerata ukioq 2007-imi aallartittup inerneri atuaganngorlutik ullumi saqqummerput. Atuagaq ”Kalaallit Nunaanni Meeqqat” 170-inik qupperneqarpoq, atuagaarniarfinnilu 150 koruunilerlugu pisiarineqarsinnaalereerluni.
Misissuineq pillugu Qanoruumi unnugu ilanngutassiisoqarumaarpoq.