Atuagaq Guutimut tunngasoq saqqummerpoq

Atuagaq nutaaq qallunaatooq taaguuteqarpoq ‘Hvad nu? Tanker om Gud til adspredelse og samling’, taannalu atuakkiortuanit Finn Lynge-mit Narsami ippassaq saqqummiunneqarpoq. Qanna ilorpiarput ammanngikkutsigu guuteqarnera paasisinnaanngilarput. Nammineq nalunngissutsitta qamuuna ilutsigut oqaluuttarpaatigut, tamannali ullumikkut ammasumik oqaluuseriumaneerussimasoq, Finn Lynge oqarpoq.

Ammasumik oqaluuserineerunnera Kalaallit Nunaanni inuusunut alianartuuvoq aamma kalaallit siusinnerusukkut taama pissuseqartoqanngilaq.

Pissuseq tamanna qallunaat ileqqoraat, Skandinaviamiut ileqqoraat. Anersaakkut eqqartuinissamut kisinneq pissuserilersimavaat, uffa killormoortua siuaasaminnit kingornutarisartik pissusissamisuuginnartoq attatiinnartussaallugu oqarlutillu anersaakkut ittunik siuaasavut eqqartuinissaminnut kisinneq ajortut. Finn Lyngep atuakkiamini aamma allaaserisimavai inuit bibelimi eqqartorneqarsimasut marluk, taakkua eqqartorneqartut pissutsimikkut ullumikkut aamma akornatsinni ilisarnaateqartut allappoq.

Aamma uagut nammitsinnut imminut qiviartariaqarpugut pineqartut uagutsinni ilisarnaatiginerigut misissorlugu, Finn Lynge nassuiaavoq, nangipporlu.

-Job –ip ilungersuutigai apeqqitut akissutissaqanngitsorpassuit taakkualu ilungersortippaat. Taama pissuseqarneq uaniittoq allaniittorlu aamma ilisarisinnaavakka. Apeqqutit inuunitsinnut attuumassuteqartut akissutissartinngisat. Tassa tamakku pissutigalugit inuit taakkua allaaseriumasimavakka, taama naggasiivoq Finn Lynge.

Atuagaq saqqummersitsisarfimmi Atuakkani saqqummersinneqarpoq 154 –nik quppernilik.