Atuagaarniaq tillinniarfigineqaqattaartoq
Tasiilami atuagaarniarfik Neriusaaq qaammatit qulingiluat ingerlaneranni arfineq-marloriarluni tillinniarfigitissimanngikkuni tillinniarfigiteriaraluarsimavoq.
Allattoq Mads Lynge
Pingasunngormat kingullermik tillinniarfigiteriaraluartoq, Gerda Vilholmip, Tasiilami pisut pillugit nittartakkatigut saqqummiussisarfimmini Sukagsaut-mi allaaseraa.
Tasiilami atuagaarfik Neriusaaq sooq tillinniarfigiteqattaarnersoq nassuiaatissaqartinneqanngilaq.
Pingasunngormat tillinniartoqariaraluarpoq, iluatsinngitsumilli. Alarmip aallartinnera pissutaalluni iluatsinngitsoorput.
Alarmi aallartikkaangat sulisunut aamma annguttarpoq, taakkualu atuagaarniarfimmut apuukkamik tillinniat qimaareersimapput.
- Tasiilami tillinniartoqarpallaaqaaq, paasiniaanermut peqataagit, kikkut tillinniartuunersut paasisariaqarparput, Gerda Vilholm allappoq.