Attaveqaateqarnermik naliliisartoq: Politikerit eqqummaarinnerusariaqarput

Kalaallit Nunaanni attaveqaateqarneq pillugu Katuami ataatsimeersuartoqarpoq, attaveqaateqarnerlu Kalaallit Nunaanni periarfissarissaartuaannassappat politikerit eqqummaarinnerusariaqartut, attaveqaateqarnermik naliliisartup John Strandip oqaatigaa.

- Kalaallit Nunaanni innuttaasut tamangajalluinnarmik internetimut attaveqarput oqarasuaatillu angallattakkat pigalugit. Isumaqarpunga tamanna pingaaruteqartoq. Sumiikkaluaraanniluunniimmi attaveqaqatigiittoqarsinnaagami, John Strand, attaveqarnermik naliliisartoq, Strand Consultimeersoq oqarpoq.

Taamatut periarfissaqartoqarnera politikerinut akisussaaffiliisoq, John Strandip oqaatigaa, Kalaallit Nunaanni inuiaqatigiinnut pissutsinik eqaannerusumik aaqqiisoqartariaqarnerarlugu.

Immap naqqatigut kabeli atorneqalerpat attaveqarniarneq siunissaq eqqarsaatigalugu akikillilaassanerarpaa, ingerlaannarli akikillinissaa naatsorsuutiginagu.

Attaveqaateqarniarnerup pitsanngorsarneqarnera ilutigalugu inuussutissarsiutitigut, ilinniartitaanikkut peqqinnissakkullu periarfissat pitsaanerusumik ammaassiffigineqassapput, assersuutigalugu isorliunerusuni nunaqarfinnilu najugallit periarfissagissaarnerulissallutik, tamannalu attattuaannarneqassappat politikerit eqqummaarinnerusariaqartut John Strandip erseqqissarpaa.

Kalaallit Nunaanni attaveqaateqarneq pillugu ataatsimeersuarneq aqagu ualikkut naammassineqassaaq.