Attartortumit piginnittumut atuisut inatsimmik unioqqutsitsinngillat

Attartortumiit piginnittumut aaqqissuussineq malillugu Namminersornerullutik Oqartussat pisortat illuinik tunisisimanerat pinerluttulerinermik inatsimmik unioqqutitsinerunngilaq. Nunatsinni politimesteri taama inerniliivoq, naalakkersuinermillu suliallit atorfillillu inatsisinik unioqqutitsisimasinnaanerat pillugu paasiniaanini unitsillugu. Politimesteri Steen Silberg Thomsen taama nalunaaruteqarpoq.

Pinerluuteqartoqarsimasinnaanera ilimagiunnaarparput.

Suliami 2004-imi aallartittumi pineqarpoq ilaqutariit ataasiakkaat illuinik pisiniarlutik qinnuteqartut inatsisit unioqqutillugit sullinneqarsimanersut. Taakkualu saniasigut pisortat illui aqqanillit pineqarput. Kiisalu illumik tunisinermi atorfillip nuimasup suliamut attuumassuteqarpallaarneranut apeqqummut tunngassuteqarpoq.

Naalakkersuisut siulittaasuata politimesterimut suliassanngortitsinera 2008-mi aprilip 25-ianni tallimanngornerugaa pivoq, politimesterilu Steen Thomsen taamani oqarpoq suliaq pinerluttulerineq tunngavigalugu suliarineqassasoq. Pisisimaneq pillugu allagarpassuaqarpoq, mappit arlalissuupput. Ineqarnermut attaveqarnermullu pisortaqarfimmi sulisut maanna nunatsinniittut Danmarkimiittullu apersorsimavagut.

Suliamik ilisimasallit apersorsimavagut soorluttaaq illunik pisisuusimasut suliamullu attuumassuteqartut apersorsimagivut.

Taava inatsisit tunngavigalugit nalilersuisimavugut tassalu qaammatit qulingiluat kingulliit tamakkununnga atorsimavagut.

Suliap aallartinneraniit naalagaaffiup eqqartuussissuserisua aningaasanik pinerluuteqarnermik suliaqartartoq suleqatigisimavarput. Sulianilu taamaattuni tamanna takornartaanngilaq.

Attartortumiit piginnittumut aaqqissuussinermik inatsisip saniatigut nunatsinni Danmarkimilu inatsisit allat misissuinermi aamma tunngavigineqarput.

Misissuinitsinni allaffissornermik ingerlatsinermut tunngasut aamma misissorsimavagut, kiisalu naalakkersuisut akisussaassuseqarnerannut tunngasumik unioqqutitsisoqarsimanersoq aamma misissorsimavarput.

Misissuinitta saniatigut tamanna attoqillattariaqarsimavarput pinerluttulerinermut inatsimmik tassani unioqqutitsisoqarsimanersoq misissortussaagatsigu.

”Pisortanut illuinik pisariaqartitsineq taamani annikilleriarsimavoq illullu pisariaqartinneeruttut aserfallatsaalinissaannut aningaasartuutikillisaanissaq kissaatigineqarpoq. Illunillu tuniniaaneq paasinninnera malillugu tunngavissaqarluarpoq.” Aallaqqaataani oqarnittut pinerluuteqartoqarsimasinnaanera ilimagiunnaarparput

Taama politimesteri Steen Silberg Thomsen Jens Thorinimut oqarpoq.

Naalakkersuisut siulittaasuat Hans Enoksen oqaaseqaammi allappoq Naalakkersuisut atorfilittallu siunertarinngimmassuk siunertarisimanngisaannarlugulu inatsisinik maleruagassanillu unioqqutitsisumik ingerlatsinissaq, ajuusaarutigalugulu nukiit, aningaasarpassuit piffissarlu annertooq, siunertanut allanut pitsaasunut atorneqartussaagaluit suliamut matumunnga atorneqarsimanerat.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat