Atortut nungullartut inuup inuuneranik akeqarataannaapput
- Ima pisoqalisimatsigipput atasuinnarmik sivisuumik qatserutitut atussagaanni aserorsinnaallutik, taamaattumik mianersuunniarlugit nalunaaquttap akunneri aqqaneq marluk qatserereerluta unittariaqarsimavugut, David Løvstrøm Aasianni qatserisartut ittuat taama oqarpoq sapaatip akunnera kingulleq eqqaavissuup ikuallarujussuarnera kingumut qiviarfigalugu.
Aasianni ikuallattoqartillugu biili qatserutitut atorneqartartoq ukiut 20-it sinnerlugit atorneqareersimasoq qajannarsisimavoq, tamannalu sapaatip akunnerani kingullermi Aasiaat eqqavissuanni qatserinermi aamma akornutaasimavoq.
- Naggataatigut biilersuit bumpeat naqitsinerloqattaalerlunilu biilersuit motorii uunnattaqqattaalermata saniatigut pumpemik allamik tatsiminngaanniit toqqaannartumik pumperisulerluta qatserineq ingerlateqqittariaqarsimavarput, David Løvstrøm oqarpoq.
Qatserutinilli isumannaatsunik peqannginneq allanngortinniarlugu ukiut pingasut matuma siornatigulli neriorsuisoqarsimagaluarpoq, qatserutit nutaanik taarserneqassasut, tamannali piviusunngortsinneqarsimanngilaq.
- Tassa ima pisariaqartigilersimagaluarpoq 2009-mili biilersuit nutaanik taarsernissaat sulissutigineqarsimagaluarluni, kisianni tassa kinguartinneqaqattaarsimapput sipaarniarnerit allallu tunngavilersuutigineqarlutik. David Løvstrøm oqarpoq.
Illoqarfiullu iluani arlaannik ikuallattoqalissagaluarpat qatserutinik isumannaatsunik atortoqarluni isumagineqarsinnaanissaat kissaataagaluarpoq atortulunneq inuup inuuneranik akeqartinnagu.
- Tassa neriunaraluarpoq ukioq naatinnagu imaluunnit ukioq aallartisimatsiariarpat qatserinermi atortut pisoqalisimaqisut nutaanik taarsernissaannut qanoq iliiuseqartoqarumaartoq, David Løvstrøm Aasianni qatserisartut ittuat oqarpoq.
