Red Barnet: Atornerluisimasut sakkortunerusumik pineqaatissinneqartalernissaat naammanngilaq
Meeqqanik kinguaassiutitigut atornerluisimasut pineqaatissinneqarnerisa nalaani katsorsarneqartarnissaat, assersuutigalugu tiingarusunnermut annikillisaataasinnaasunik nakorsaatinik atuisoqarneratigut isumagineqartariaqartoq, suliniaqatigiiffimmit 'Kalaallit Nunaanni Meeqqat ikiortigit'-mit isumaqarput.
Tiingarusunnermut annikillisaataasinnaasunik atuisut Herstedvesterimiinerminni aallartitsisimasut nunatsinnittut ikittuararsuusut Naaja Nathanielsenip aamma oqaatigaa.
Allattoq Thomas Munk Veirum
oktobarip 29-at 2018 17:11
Nutserisoq Ane-Marie Petersen
Atornerluisimasut sakkortunerusumik pineqaatissinneqartalernissaat naammanngitsoq, Meeqqat Ikiortigimit isumaqarput.
- Isiginiartariaqarpagut aamma kinguaassiutitigut atornerluisimasut parnaarunneqaraangamik qanoq pineqartarnerat. Assersuutigalugu tiingarusunnermut annikillisaataasinnaasumik katsorsarneqarnissamut periarfissaqarnersoq, taamaassimappallu nammineq imaluunniit pinngitsaalisaalluni katsorsartittoqarsinnaanersoq paaserusunnarluni, Red Barnetimeersoq Jonna Ketwa oqarpoq.
AAMMA ATUARUK Kinguaassiutitigut atornerluisartut katsorsarsinnaavavut
Taama kissaateqarneq aallaaveqarpoq Naalakkersuisut siunnersuuteqarmata pinerluttulerinermik inatsimmi allannguinissamik, tamanna ilaatigut meeqqat aqqaneq-marluk inorlugit ukiulinnik atoqateqartoqarsimatillugu pinngitsaaliisimasutut inatsisaatsuliortutut nalilerneqartalernissaannik imaqarpoq. Tiingarusunnermulli annikillisaataasinnaasumik katsorsarneqarnissamut periarfissaq, 'Meeqqat Ikiortigit'-nit ujartorneqartoq, pinerluttunik isumaginnittoqarfimmi pisortamit mianersorfissaqarnera nassuiaatigaa.
- Tamanna imaaliallaannarlugu atulerneqarsinnaanngilaq, taamatut katsorsaariaaseqarniaraanni piffissarujussuaq missuinerpassuillu atoqqaarlugit ingerlanneqartarmat. Akunnerpassuarni oqaloqatigiinnikkut katsorsaaneq ingerlanneqaqqaartarpoq nalilersuinerpassuillu ingerlanneqaqqaartarlutik. ( ...) Iisartagartornermi aamma missortinnerit ataavartumik ingerlanneqartarput iisartakkallu sakkortullutik, Pinerluttunik Isumaginnittoqarfimmi pisortaq Naaja Nathanielsen oqarpoq.
AAMMA ATUARUK Kinguaassiutitigut kanngutsaatsuliortartut katsorsarneqartalissasut
Kinguaassiutitigut atornerluisimasut isertitsivimmiikaangamik ullumikkut katsorsarneqarneq-ajortut, Pinerluttunik isumaginnittoqarfimmi pisortap nassuiaatigaa.
- Ullumikkut tamanna periarfissaanngilaq. Parnaarussanulli neqeroorut eqqaariigara periarfissaavoq, aammalu kommunini assigiinngitsunik periarfissat aamma atorneqarsinnaallutik. Katsorsaariaaseq "Mumik" eqqaariigara tassaaneruvoq eqqarsartaatsimik allanngortitsinissamik siunertalik, taannalu tamanut neqeroorutigineqartarpoq, Naja Nathanielsen oqarpoq.
Tiingarusunnermut annikillisaataasinnaasunik atuisut Herstedvesterimiinnerminni aallartitsisimasut nunatsinnittut ikittuararsuusut Naaja Nathanielsenip aamma oqaatigaa. Nunatsinnilu katsorsaariaatsimik aallartitsinissamut ilisimasalinnik amigaateqartugut, ukiulli ingerlaneranni misilittagaqarfigileriartorumaarigut taassuma aamma ilimagalugu oqaatigaa.
