Atornerluisarsimanerit assilissami ikaartitikkami oqaluttuarineqarput
Oqaluttuat amerlanertigut nuannersuuneq ajorput, tassami atornerlugaanermut naalliutsitsinernut ilaatigut tunngasuupput.
Assiliarujussuaq ikaartitigaq The Witness Blanketimik atserneqarsimavoq, meerarpassuit inuunerannik oqaluttuaanillu eqqaaniaanertut isigineqarluni.
Assilissap ikaartitikkap immikkoortua siulleq ukioq ataaseq sinnerlugu suliariniarneqarsimavoq. Indianeri eqqumiitsuliortoq Carey Newman, assigiinngitsunit ikiorneqarluni, Canadami angalasimavoq, meeqqat atuarfinni nerisaqarfiusuni ineqarfiusunilu atuartuusimasut pillugit eqqaassutissaasinnaasut katersorsimallugit. Eqqaassutissatut nalilerneqarsinnaasut tuusintilikkaat katersorneqarsimapput, soorlu titartagarpassuit, meeqqat skuui assigisaallu.
Tamakku tassa assilissami ikaartitikkami ilaatinniarneqassapput. Assiliaq ikaartitigaq taanna 12 meterinik takissuseqarpoq, 2 meterinillu portussuseqarluni.
Immikkoortoq siulleq British Columbiami sapaatip-akunnerata massuma ingerlanerani saqqummersinneqartussaavoq. Taassuma kingorna suli ukioq ataaseq sulisoqassaaq, assiliaq ikaartitigaq naammassineqarnissaanut. Canadap ilumoortussaq saammaasseqatigiinnissarlu pillugu ataatsimiititaliarsuaata sulineranut atatillugu Canadami illoqarfinni assiginngitsuni saqqummersinneqartussaalluni.
