Atorfinititsinermi kammalaatersortoqartarneq oqallisigineqalerpoq

Kattuffissuup Transparency Internationalip nunarsuarmi tamarmi peqquserlulluni kammalaatersortarnermik paasiniaasartup Danmarkimi immikkoortortaa aaqqissuisuuvoq.

Ilimmarfimmi oqallitsitsinermi oqalugiartussat ilagaat Pia Vedel Ankersen, Ilimmarfimmi Allaffissornermut ilisimatusarfimmi lektoriusoq. Taanna ilinniartut peqatigalugit atorfilinnik, kinaaneri isertugaasunik, atorfinitsitsisarnerni politikkikkut akuliuffigineqartarneq pillugu apersuisimavoq.

Ilumut kammalaatersortoqartartoq, Pia Vedel Ankersen oqarpoq.

- Kammalaatersortoqartarpoq, pingaartumik atorfinitsitsiniarluni piginnaasassat sivisuumik eqqartoreerlugit, atorfinittussatut innersuunneqartoq ilaanni politikkikkut akuliuttoqarneratigut allanngortittariaqartarpoq. Tassa suliffeqarfiup toqqagaa politikkikkut akuliuttoqarneratigut allamik taarserneqartarpoq, Pia Vedel Ankersen nassuiaavoq.

Misissuinermili inuit apersorneqarsimasut 23-iinnaammata nalunaarusiaq tamakkiisuunngitsutut taarusuppaa.

- Nalunaarsukkat erseqqissumik takutitsisut ullumikkut piginngilagut, taamaammat oqaatigiuminaappoq kammalaatersorneq Kalaallit Nunaanni qanoq atugaatiginersoq.

Danmarkimi illoqarfiit ilaat Randers Kalaallit Nunaata inuttoqatigaa, tassanilu kammalaatersorneq takussaasarpoq, qanorli Kalaallit Nunaanni atugaatiginersoq nalunarpoq.

- Kammalaatersornerup qanoq atugaatiginera erseqqissumik paasisaqarfiginiarutsigu apeqqutinik krydsilersugassanik, assersuutigalugu sulisitsisut kattuffiisa ilaasortaannut nassiussugassanik suliaqartariaqassaagut. Apeqqutit kammalaatersortarnermut tunngasut akissutaat tiguneqareerpata aatsaat tunngavissaqarluartumik kammalaatersornerup qanoq atugaatiginera takussutissaqartilissavarput, Pia Vedel Ankersen erseqqissaavoq.

Ilimmarfimmi, Ilisimatusarfiup aaqqissugaanik, aqagu nalunaaqutaq ataatsimiit oqallitsitsinissaq tamanut ammasuuvoq. Iserneq akeqassanngilaq.

Oqallinnermi qaaqqusanut aamma ilaapput, politikerit, sulisitsisut peqatigiiffiannit aallartitaq aamma tusagassiortoq Elna Egede.