Atorfineqqusiunnaarneq tupaallaatigaat

Atorfineqqusiunnaarluni mattussineq atuarfiup namminersortup taamaallaat tusagassiorfitsigut tusarsimavaa, taamaattorli siulersuisut nassuerutigaat, juunip naalernerani IMAK-imit allagarsisimallutik, allakkani kattuffimmit atuarfik namminersortoq IMAK-imit kajumissaarneqarluni isumaqatigiissuteqarnissaq siunertaralugu saaffiginneqqullugu.

- Piffissap taamaalinerani siulersuisuni ilaasortat amerlanerit sulinngiffeqarput atuarfillu suli piviusunngortinneqarani, saaffiginnissullu taamaalinerani annerusumik iliuuseqarfigineqanngilaq, Johan Meyer nassuiaavoq.

Sisimiuni atuarfimmit namminersortumit eqqumiigineqarpoq, atuarfimmut aallarteqqammersumut, atuarnerup aallartinneranit ullut 14-it qaangiutiinnartut atorfineqqusiunnaarluni mattussineq aallartinneqarmat, taamaattorli IMAK-ip qisuariaatissaa pissanngatigineqarpoq, tamatumali oqaloqatigiinnikkut pinissaa, tusagassiuutitigullu naalakkeerpalaanngitsumik pinissaa kissaatiginartoq, Johan Meyer allappoq.

Atuarfiup isumaqatigiissuteqarnissaq pillugu isumaqatigiinniarusulernera nuannaarutigalugu IMAK-ip siulittaasua Sivso Dorph Radioaviisimut oqarpoq.

- Maanna juunimi allakkatta akineqarnissaat naatsorsuutigisinnaanngorparput, isumaqatigiinniarnerillu aallartillugit, Sivso Dorph naggasiivoq.