Atorfimmut atatillugu ineqartitsisarneq atorunnaarsinniarpaat
- Atorfimmut atasumik ineqarsinnaanerup neqeroorutigineqartarnerata qaangeriartuaarnissaa kissaatiginartorujussuuvoq, sulisitsisumut oqinnerussammat, atorfilimmullu atorfimmut pituttuiunnaassalluni, aatsaallu atorfeqaraanni ineqarsinnaanermut pituttorsimanerup qasukkartinneqarnissaa uagut kissaatigaarput, Kuupik Kleist oqarpoq.
Ineqartitsigallarnermut aningaasartuutit aamma amerlavallaarnerat ilaatigut pissutaallutik Namminersorlutik Oqartussani atorfinitsitsisarneq killilersorniarneqarpoq.
- Aningaasartuutit aqunneqarnissaat uagutsinnut sakkortuumik pisussaaffiuvoq. Ukiuni qaangiuttuni takuneqarsinnaavoq najugaqarallarnermut aningaasartuutit aqunneqarsinnaajunnaarsimagaluartut, aningaasaliissutigineqartarsimasullu qaangerlugit atuisoqartarsimasoq, Naalakkersuisut siulittaasuat oqarpoq.
Inuit Ataqatigiit ineqarneq pillugu oqaaseqartartuata Olga P. Berthelsenip atorfinitsitsisarnerup uninngatinneqarnera januaarip 18-ianni oqaaseqarnermigut eqqarsarnartoqartippaa, innuttaasunik sullissineq arriilleriassangatillugu.
Kisianni sulisussanik ilinniarsimasunik pissarsiornissap ajornartorsiutaalernissaa Kuupik Kleistip ilimaginngilaa.
- Neriuppugut inissialiortiternikkut nutaamik naliginnaasumik attartorneqarsinnaasunik sanaartortitsinerup, pingaartumik Nuummi amerlisaanikkut tamanna qaangeriartorneqarsinnaasoq, Naalakkersuisut siulittaasuat Kuupik Kleist oqarpoq.
