Atorfillit: Aqutsisup killileeriaraluarnera pissusissamisuunngilaq

Inatsisartut siulittaasuata tullerpiaata Aqqaluk Lyngep Inatsisartut ataatsimiinneranni aqutsilluni Demokraatit siulittaasuat Per Berthelsen oqalugunnaarsikkamiuk pisinnaatitaanini qaangerlugu iliorpoq, Inatsisartut allattoqarfiat taama naliliivoq.

Oqalugunnaarsitsineq pivoq Namminersornerullutik Oqartussat kalaalinngorsaavigineqarnerannut atatillugu Inatsisartuni oqallinnerup sakkortuup pinerata nalaani, oktoberip ulluisa 15-anni.

Per Berthelsenip oqaluttarfimmit oqaasiinut ilaapput isertortumik oqaatiginninniartoqartoq Siumumit Isak Davidsenip Otto Jeremiassenillu ilanngussaat eqqarsaatigalugit.

Demokraatit siulittaasuata Siumukkormiunit oqaatiginiarneqartut toqqaannartumik oqanngikkaluarluni assersuuppai Tysklandip nazistinit aqunneqarnerata nalaani pisutut oqaatigisariaqartut.

Tamanna Aqqaluk Lyngep ingasagaa Per Berthelsenilu qinnuigaa nipangeqqullugu.

- Per Berthelsenip oqaasii pissusilersorneralu tunngavigalugit Aqqaluk Lynge akuliunnissaminut tunngavissaqanngilaq, taamaammallu eqqarsarnartoqarpoq ataatsimiinnermik aqutsisoq taamaalilluni oqaluttup oqalussinnaatitaaneranik killileeriaraluarmat, Inatsisartut Allattoqarfianni atorfillit naliliipput.

Taama naliliineq Inatsiarsut Siuliittaasoqarfiata ullup ilaa oqaluuserissavaa.