Atorfillit 37-t Island aqqusaarlugu angalasimapput
Namminersorlutik Oqartussat pisiniartarnermut immikkoortortaani kisitsisit pissarsiarineqartut tunngavigalugit, Atuagagdliutini ullumi saqqummersuni taama allaaserinnittoqarpoq.
Isumaqatigiissut ukiup matuma aallartisimalernerani oqallisaaqaaq, tamatumunngalu atatillugu Naalakkersuisunik nikisiterisoqarmat, Palle Christiansen aningaasanut naalakkersuisutut tunuartitaavoq.
Naak periarfissap taassuma, tassa Islandimiut timmisartuutileqatigiiffiannut ilaanikkut 10 procentimik akikillisaavigineqarsinnaaneq, ikittuinnarnit atorneqarsimagaluartoq, Palle Christiansenip isumaqatigiissut kisaatigineqartutut ileqqaarfiusimanerarlugu aalajangiusimavaa, oqarluni taamatut isumaqatigiissuteqarnikkut millioninik marlunnik kiisitsisitalinnik ileqqaartoqarsimasoq.
- Angalasut 37-iinnaat aallaavigalugit naliliissagutta, taava isumaqatigiissutip sunniutaa equngasumik isigineqassaaq. Air Greenlandip timmisartornermut akigititani, Air Icelandip akigititaanut appartissimammagit, sipaaruteqarnerpaaffigaarput. Palle Christiansen maanna ilinniartitaanermut naalakkersuisuusoq Atuagagdliutinut taama oqarpoq.
Aningaasanik millioninik marlunnik kisitsisitalinnik ileqqaartoqarsimanersoq, Namminersorlutik Oqartussani Aningaasaqarnermut Sulisoqarnermullu naalakkersuisoqarfimmit aviisimut uppernarsarneqanngilaq.
Tassannga taamaallaat maluginiarneqarpoq, Air Greenlandip akigititaminik appaanera ukiormanna aappaagumullu angalanernut aningaasartuutinik ikilitaassasoq.