Atorfilittat saassunneqarnertik tupaallaatigaat
Naalakkersuinermik suliaqartut atorfilittat aqqisigut taallugit taanagilluunniit saassussisarnerat taamaatittariaqalerpoq, Danmarkimi inatsisilerituut aningaasaqarnermillu immikkut ilisimasallit kattuffiat taama nalunaaruteqarpoq.
Royal Greenlandip aningaasatigut inissisimaneranut tunngatillugu Namminersorlutik Oqartussani inuit aqqisigut taallugit Finn Karlsenip KNR-ikkoorluni saassuserereersorli oqaaseqaat takkuppoq.
Atorfilittat ullumikkut allaffissornikkut aqutsinermi inissisimapput, kikkut Inatsisartuni amerlanerussuteqarnersut apeqqutaatinnagu.
-Tamatumani aaqqissuussinissaq qinerneqarsinnaasoq alla tassaavoq, nutaamik qinersisoqarpat atorfilittat taarserneqarlutik. Tamanna Kalaallit Nunaanni ullumikkut ingerlatsinermi suliamut atasumik ilisimasaqarnermik sanngiinnerulersitsissaaq, atorfilittat nutaat naalakkersuisut nikinneri tamaasa aallaqqaataaniit aallartittalissappata, Kalaallit Nunaanni DJØf-imut klubbimi siulittaasoq Sebastian Bach Hansen oqarpoq.
Taanna aamma oqarpoq naalakkersuinermik suliallit inuit ataasiakkaat kinaassusiisa saqqummiunneqarnissaat eqqarsaatigalugu mianersornerusariaqarput, soorlu matumani ataatsimiinnerit innersuunnerisigut atorfilittat kinaassusersineqarsinnaasut.
-Naalakkersuinermik suliallit soorunami naqisimaneqanngitsumik oqalussinnaatitaapput, kisiannili allaffissornikkut aqutsinermut naalakkersuinikkut attuumassuteqanngitsumut pasilliinernik oqaaseqartoqartillugu tamanna uppernarsaatissanik piviusunik tapersersorniagassaraarput, matumanilu Finn Karlsen ersarinngitsumik oqaatigitsiakkanik sakkortuumillu pasilliinernik – aammattaarli tigussaasunik uppernarsaatissartaqanngitsunik – saqqummiussivoq, Sebastian Bach Hansen oqarpoq.