Atorfilittat apeqquserneqarsinnaagunaraluarput

Naalakkersuisut marluk ilassinnissutinik atuivallaarsimanertik pillugu manna tikillugu tunuarsimapput, eqqartuussisuserisulli Nuna Advokatit nalunaarusiaat naapertorlugu, Namminersornerullutik Oqartussani atorfilittat akisussaanerat akisussaaqataanerallu aamma apeqquserneqarsinnaagunaraluarput.

Inuit 13-it Nuummi neriniartarfimmi Charoen Pornimi januaarimi neqatigiissimapput 3.163 koruunit nalinginut. Tamanna immini tupinnartortaqarujussuarunanngikkaluarpoq. Maluginiagassaavorli, aalisarnermut piniarnermullu naalakkersuisuusimasoq Rasmus Frederiksen ilaqqutanilu sisamaallutik ilaqutariinnik allanik, tassalu Mølgaardikkunnik Lyberthikkunnik, Jeremiassenikkunnik kiisalu Evaldsenimik Egedemillu naggatilinnik akileraartartut akiligaannik nereqateqarsimammata, inuulluaqqusinertut taallugu. Nereqatigiinneq tamanna atorfilittap nereqataasup Namminersornerullutik Oqartussanut akilersissimavaa, ilassinnissutitut taallugu.

Rasmus Frederiksen apriilimi viinneerniarfimmi Vinsluttet-mi 2.118 koruuninut aamma viinnisisimavoq, angerlarsimaffimmi neqareqatigiissitsinernut atugassatut allallugit. Taakkulumi ilassinnissutinit akilerneqarsimapput, Aalisarnermut Piniarnermullu Pisortaqarfimmi atorfilittanit ataasiinnanngitsumit akuerineqarluni atsiorneqarsimalluni.

Naalakkersuisut ilassinnissutinik atuisarnerat pillugu naalakkersuisut kaajallaasitaanni allassimavoq, ilassinnissutitut taasat uppernarsarlugit naalakkersuisoq imaluunnit tamatumunnga pisinnaatitaasoq atsiortussaasoq. Taamatuttaaq suna pillugu ilassinnittoqarnersoq kikkullu peqataanersut allassimasussaavoq.

Nuna Advokatit nalunaarusiaanni Namminersornerullutik Oqartussani atorfilittat akisussaasuunersut imaluunnit akisussaaqataanersut nalilerneqarsimanngilaq. Nalunaarummili allassimavoq, atorfilittat allanut tunngasuni atsiorsimagaangata akisussaatitsiniarnerni akisussaaqataasitsiniarnernilu aalajangiisooqataasinnaasut.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat