Atoqatigiinneq ilaqutariinni eqqartorneqarnerusariaqarsoraat
Meeqqat angajoqqaallu akornanni ammasumik oqaloqatigiissinnaaneq, isumasioqatigiinnermi inerniliussat ilagaat. Meeqqat inersimasunngorunik atoqatigiinnikkut peqqinnartumik ileqqoqalernissaat, oqallinnermut aallaaviusoq.
- Iliuutsit atoqatigiinnermut tunngasut tamarmik pinngitsaaliinertaqanngitsuunissaannut aammalu inatsisaatsuliornertaqannginnissaanut, Nunatsinni innuttaasut tamarmik periarfissaqarnissaat pingaartupilussuuvoq, nakorsaq Gert Mulvad oqaluttuarpoq.
Immaqa atoqatigiinnerup pinngitsaaliinertaqannginnissaanik oqarnissaq pissusissamisuuinnartutut isigineqarsinaagaluarpoq. Kisianni Gerth Mulvad oqarpoq, taamaanngilluinnartoq.
Aamma pingaartuunerarpaa, inuit ataasiakkaarlutik nalussanngikkaat misigissagaallu, kina atoqatigissallugu nammineerlutik qinersinnaagamikku aammalu qanoq atoqatigiikkusunnerlutik aalajangersinnaammassuk.
- Angajoqqaat atoqatigiittarneq pillugu meeqqaminnut ammasumik oqaloqatiginnittarnissaat amigaataasoq, misissuinerit ilaasa takutippaat. Taamannak oqaloqatigiinnissaq ileqqorineqarpallaanngilaq, Gert Mulvad oqarpoq.
Ajornartorsiut taanna anigorniaraanni suliniut Maniitsumi ukiuni arlalinni ingerlanneqarsimasoq innersuussutigaa.
- Maniitsumik peqqinnissaqarfiup atoqatigiinnermut tunngasut atuarfinni ilinniartitsissutigissallugit neqeroorutigisarpai. Kisianni angajoqqaat meeqqatillu atoqatigiinnermut tunngasunik oqaloqatigiittalernissaannut sulinissaq ajornarnerujussuussaaq. Kisianni KNR-ip aallakaatitassiai nangeqattaartut ilaat, Nuunu tutillugu, assersuutigineqarsinnaavoq, atoqatiginneq pillugu ilaqutariippassuarni ammasumik oqaloqatigiinnerulernissamut aqqutissatut, Gert Mulvad peqinnissaq pillugu Nuummi isumalioqatigiittuni peqataasoq oqarpoq.
