Atomip nukinga atorlugu nukissiorfittaaleqaagut!

Siunertaaqqaaraluarpoq erngup nukinganik nukissiorfiliortoqarnissaa maannali allanngortinneqarpoq atomip nukinga atorlugu nukissiorfiliortoqassasoq.

Taama allannguinermut patsisaavoq silap allanngoriartornera.

Nunat tamalaat atomi atorlugu nukissiorfiliorfiutaat Nuclear global energy naalisarlugu NGE-mik taaneqartartoq maanna alcoa suleqatigalugu atomi atorlugu Kangerlussuarmi nukissiuutiliortoqarnissaanik pilersaalerpoq.

Atomi atorlugu nukissiorfiliornermi Alcoap pilersorneqarnissaa siunertarineqarpoq, taamatuttaaq Maniitsoq Sisimiut taakkulu nunaqarfii arfinillit pilersorneqassapput. Atomi atorlugu nukissiorfiliornissaq Maniitsup borgmesteriata assut nuannaarutigaa.

- Uanga akornutissaqartinngilluinnarpara Alcoa erngup nukinganut taarsiullugu atomip nukinga atussappagu. Tassa tusagaq nuannaarutigiinnarpara, kikkut tamarmik nalunngisaattut aluminiumik aatitsinissamut tunngatillugu Maniitsumi annertoorujussuarmik piareersaateqareerpugut pilersaarusiornikuullutalu, Søren Lyberth oqarpoq.

Sapaatip akunnerata uuma siuliani suliffiutillit naapisissimagitsik aammattaaq unnerpaa.

- Maniitsormiunaasiit ajorsartitaanermik misigitissanngikkutsigit atomi atorlugu nukissiuuteqalernissaq akuerisariaqarparput allatut iliornissaq uanga akissaqarfigisorinngilara, Søren Lyberth oqarpoq.

Taassuma erseqqissaatigaa taama pilersaartut nutaaliaanerpaanik atortoqartussaasut.