Atomi atorlugu nukissiorneq oqallisigeqqilerpaat
Italiami naalakkersuisut siulittaasuat ippassaq unnukkut oqarpoq, uuliap akia qummut killilerneqanngippat, EU atomip nukinganik nukissiornermut annertuumik aningaasaliisariaqartoq. Tyskland aamma Tuluit Nunaat aammattaaq taama nipilimmik saqqummiussipput.
Italiami ministeriuneq uuliap akiata qaffasinnerujussua qatsutivillugu ersarissumik ippassaq unnukkut nalunaaruteqarpoq. Ullumikkut inuit akornanni tamanna ajornartorsiutaanerpaavoq, taamaattumik nunat uuliamik atuisut piaarnerpaamik naapittariaqarput, uuliallu akia qummut killilerlugu, Berlusconi oqarpoq. Taamaattoqanngippat atomip nukinganik nukissiorneq annertuumik piorsaavigineqartariaqarpoq. Berlusconi isumaqarpoq aatsaat taamatut sioorasaarisoqarpat, nunat uuliamik tunisassiortut, uuliap akianik appaassasut.
Kisianni ullumikkut taama isikkoqanngilaq. Uuliap akia ullumikkut appaallassimagaluarpoq, kisianni uuliamik tuniniaasartut oqarput, Berlusconi akinik appaanissamut pissutissaqanngitsoq.
Kisianni uuliamik tuniniaasartut immaqa tusaaniarnerusariaqarput, tassami Tuluit Nunaanni ministeriunerup Gordon Brownip aamma oqaatsit taakkorpiaat atulermagit Tuluillu Nunaat ukiuni tulliuttuni 15-ini atomip nukinganik nukissiorfinnik arfineq-pingasunik sanasoqarnissaanik pilersaaruteqalerluni.
Aamma Tysklandimi atomip nukinga atorlugu nukissiuuteqarneq pillugu oqallinneq aallarteqqippoq. Tysklandimi pilersaarutaagaluarpoq 2021-ip tungaanut atomip nukinganik nukissiorfiit atorunnaarsikkiartuaarneqassasut. Tamanna naalakkersuisoqatigiinni konservativit aamma socialdemokratit akornanni isumaqatigiinngissutaalerpoq. Kanslerip Angela Merkelip atomip nukinganik nukissiorfiit attatiinnarusuppai, socialdemokratilli
atorunnaarsikkusuppaat.
