Atlantikup avannaani suleqatigiit ukiut tallimanngortorsiorput
Nunarsuup avannaani naalagaaffiit isumannaatsuunissaanik politikki qitiutillugu Folketingimi Atlantikup Avannaani Suleqatigiit ullumi oqaluuserissavaat.
Ataatsimiinnermi From Ice to Fire – kalaallisut immaqa ima nutserneqarsinnaasoq – Sermimiit innermut – ullumi pisussami Illersornissamut ministeri, Søren Gade, pingaarnertut oqalugiartussaavoq.
Oqalugiartussat allat tassaapput Naalakkersuisut siulittaasuat, Hans Enoksen, Savalimmiuni Inatsisartut siulittaasuat, Jóannes Eidesgaard aamma USA-mit, Ruslandimit, Islandimit Norgemiillu aallartitat.
Atlantikup Avannaani Suleqatigiit ukiuni tallimani atareersimanerat ataatsimiinnermi malunnartinniarneqarpoq, taanna 2001-imi decembarimi aallartinneqarpoq.
Ataatsimiinneq uagut nalunaaqutarput malillugu nalunaaqutaq qulingiluanut aallartissaaq.
Apeqqutaavorli Folketingimi ilaasortat allat tamatumunngarpiaq soqutiginnissanersut. Piffissarmi taannarpiaq eqqorlugu Irakimi sorsuunneq pillugu Folketingip ataatsimiittarfiani apeqquteqaateqartoqartussaavoq. Danskit sakkutuuisa piaartumik angerlartinneqarnissaat illuatungiliuttut tunngavilersortussaavaat.
Afghanistanimi sorsunneq pillugu akissutinik nutaanik illuatungiliuttut aamma piumasaqarput. Filmi piviusulersaarut ”Den hemmelige krig” takutinneqaqqaareersorlu tamanna piumasarineqalerpoq.
Afghanistanimiut sorsunnermi tigusaasimasut 31-t danskit sakkutuuisa amerikamiut sakkutuuinut tunniunneqartut filmimi isiginnaarneqarsinnaavoq.
Amerikamiut Kandaharimi sakkutooqarfianni afghanistanimiut naalliutsinneqarnerat filmimi malinnaavigineqarsinnaavoq. Folketingimi illuatungiliuttut maanna piumasaraat ministeriuneq Anders Fogh Rasmussen juullertinnagu paasissutissiisariaqartoq.
