Atlantikup Avannaani Suleqatigiit sunniutaarutitinniarneqarput

Partii ministeriuneqartitsisoq, Venstre, Folketingimi isumaqatigiissummik allanngortitsiniarpoq, taamaalilluni Atlantikup Avannaani Suleqatigiit – Kalaallit Nunaanniit marlunnik ilaasortallit – Danmarkimi pissutsinut sunniuteqannginniassammata. Taamatut iliuuseqarniarneq iluatsissappat Folketingimut ilaasortaq, Pia Christmas Møller, Konservativiniit tunuaqqammersoq, sunniutaarutitinneqassasoq, nutaaarsiassaqartitsivimmi Ritzau-imi allaaserineqarpoq.

Venstret pilersaarutigaat Christiansborgimi partiit akunnerminni isumaqatigiissutaata allanngortinneqarnissaa, taamaalilluni Folketingimi taasinernik kisitsisarnermut malittarisassaq allanngortinneqarsinnaaniassammat.

Nutaamik isumaqatigiissuteqarnikkut Pia Christmas Møllerip tunuarneratigut ikinnerussuteqalersut, Venstret, Konservativit aamma Dansk Folkepartiit nukittorsarneqarsinnaapput.

-Massakkut inissisimanerput naapertorlugu ilaasortat pingasut Atlantikup Avannaaneersut taasinerni ilaatinneqartarput, taamalu Danmarkimi pissutsinut toqqaannanngikkaluartumik akuliuttarlutik, Venstret gruppeanni allatsi, Jens Vibjerg, oqarpoq.

Assersuutigalugu kalaallit Folketingimi ilaasortaatitaat, Juliane Henningsen aamma Lars-Emil Johansen irakimiut nunasiniarlutik qinnuteqartut itigartitaasut pillugit illuatungiliuttunut taaseqataanissaminnut piareersimapput.

’Suliassami matumani taaseqataanngitsoortoqarsinnaanngilaq. Taamaattumik Socialdemokratit illuatungiliuttullu allat taaseqatiginiarpakka, Lars-Emil Johansen oqarpoq, tassami nalunngilluinnarpaa taaseqataanngitsooruni naalakkersuisut amerlanerussuteqalissasut.