Ativit isumaa misissoruk
Kalaallit aqqi isumarpassuaqartarput, ilaatigulli nalorninarsinnaasarluni qanorpiaq isumaqarnersut, tamannalu aamma Oqaasileriffimmut saaffiginnissutigineqartarsimaqaaq.
Taamaammat Oqaasileriffik atuakkamik saqqummersitsivoq. Taana taaguuteqarpoq Kalaallit aqqi. Kalaallit aqqi tulleriiaarlugit qanoq isumaqarnersut aammalu qanoq tunuliaqutaqarnersut tassani allaaserineqarput.
- Ukiut ingerlanerini amerliartuaarmata piukkutilersimavagut atuaganngorlugit, amerlanernut atuarsinnaanngoqqullugit saqqummiutissallugit, atuakkiortoq Nuka Møller taama oqarpoq.
Aamma atuaruk Atuakkiortoq Oqaasileriffimmi pisortanngortoq
Anngali, Qujagi, Taqqik aterpassuillu allat alutornavissut atuakkami allassimapput, tamarmillu isumaat aamma nassuiaateqarlutik.
- Suersaq nukappiaqqat aqqat kinguliaqut, toornat oqaasiinit avanersuarmit, isumaa oqaaseq una naggueralugu suuarsagaq, suersagaq, tassa aaqqitaq katsorsagaq.
Nuka Møllerimut alutornarnerpaasimapput toornap oqaasiinik angakkullu oqaasiinit aallaavillit upperisattoqqamit aallaavillit nassaaralugit.
- Immikkuullarissuummat aamma upperisatoqqamut attuumassuteqarlutik, toornanut atsiussat aarnussanut ikiortinut atsiussat tamakkua oqaluttuassartai soqutiginarsimapput aamma, Nuka Møller taama oqarpoq.
Aamma atuaruk Ittoqqortoormiit Nunatsinni tamarmik assigiimmik ateqalerpoq
Aqqit immikkuullarissorpassuit immikkut tamarmik allaaseriniarneri imaannaasimanngeqaaq. Atuagaq katillugit ukiut marluk allassimavaa.
- Oqaluttuatoqqanik ujaasilluta, ajoqersuiartitat ullorsiutitoqaannik atuarluta, ordbogitoqqani, naggueqatitta ordbogiini naggueqatittalu oqaluttuatoqaanni, inuillu toqqaannartumik saaffigisarlugit, assigiingitsorpassuarni aallerfeqarsimavugut, atuakkiortoq Nuka Møller oqarpoq.
Atuagaq oqaatsinik assigiinngitsunik pingasunik allagaasoq tunisaallualereersimasoq, nunanilu allaniit aamma piumaneqarnera malunnarsereertoq Nuka Møller oqarpoq.
