Atisanik ilusilersuisartut nunatsinneersut Tivolimi takutitsipput

Atisanik ilusilersuisartut nunatsinneersut ilisimaneqarpianngitsut kalaallit Tivolimi naapinnerat iluaqutigalugu ilisimaneqarnerulersinnaapput. Taama angusaqarniaraanni pimoorussilluni sulisoqartariaqarpoq, arnat inuusuttut atisanik ilusilersuisartut sisamaasut ilaat marluk taama oqarput. Nunarsuarmi qeqertat annersaanneersut taakku atisanik Tivolimi naapisimaartunut ukioq manna takutitsipput.

Pantomimeteaterimi popimik nipilersuuserlugit meeqqat takutitsivimmi sungiussisimarpasillutik atisanik takutitsipput. 28-inik ukiulik Ajâja Pedersen atisanik takutinneqartunik ilisserisuuvoq. Aasianni inunngorpoq Københavnimilu maanna najugaqarluni. Ajâja Pedersen ukioq kingulleq Tivolimi naapittoqarmat aamma peqataavoq peqataasarninilu iluaqutigisimanerarpaa.

- Ukioq kingulleq arlallit attaveqarfigivaannga paasissutissanik piniarfigalunga. Annerusumik meeqqat atisaannik atisalioqquniarlunga taamaaliorput. Tivolimi takutitsisimanngitsuuguma ilisimalersimassanngikkaluarpaannga, Ajâja Pedersen oqarpoq.

Kalaallit ukioq manna Tivolimi naapinneranni meeqqat inersimasullu atisaannik takutitsinerup ataqatigiissaarnera Ajâja Pedersenip akisussaaffigaa. Meeqqat qulit inersimasullu aqqanillit ulluni pingasuni arfinileriarlutik atisanik takutitsissapput. Arnat kalaallit inuusuttut pingasut allat 25-niit 32- nut ukiullit atisaliaat Ajâja Pedersenip atisaliaanut tapullugit takutinneqarput. Arnat atisanik ilisserisut ilaat paamiormiu Nicki Isaksen ukioq kingulleq aamma peqataavoq. Taanna isumaqarpoq atisanik ilisserisartut kalaallit Tivolimi naapinnerat iluaqutigilluarsinnaagaat.

- Ilaana iluaqutaasorujussuuvoq. Nammineq allaanerusumik ilusilersuisinnaaneq misileraaffigissallugu pissanganartarpoq takutitsivigisallu qanimut naapisinnaaneri aamma nuannequtaalluni. Atisanik ilisserisartut allat tamatuminnga misiliisariaqarput,

Nicki Pedersen naggasiivoq.

Atisanik ilusilersuisartut marluk allat tassaapput Louise Lynge Hansen aamma Aviâja Hammeken Schultz.