Atisaliat nutaat

Isaksen Designip Great Greenlandillu atisaliaat arnanit angutinillu qulinit Hotel Arcticimi ippassaq unnukkut takutinneqarnerat iluatsilluarpoq. Ilimagisanniit iluatsinnerujussuarmik kusanarnerusumillu ingerlavoq, Paneeraq Andersen Great Greenlandimiit takutitsinermut peqataajartortoq tupaallaqqaqisoq oqarpoq.

Glacier Shopimi piginnittup tuniniaasuusullu Susanne Møllerip takutitsisut qulit nammineq toqqartorlugit qaammatip ataatsip ingerlanerani sapaatip akunnikkaartumik sungiusarluarsimagamigit. Atisat pisiniarfinnut massakkut anngupput, atisanillu takutitsinerup kinguneranik arnat arlallit atisarsitikkusulerpaat. Aamma angutit atisanik soqutiginnittut alapernaaserluarput.

-Takutitsisunut peqataalluni nuanneqaaq, atisat kusanarlutillu iluarnermut assut pilerinarput, Kristine Thomsen takutitseqataasoq oqarpoq.

Peqataasut isiginnaartullu takutitsinerup kingorna atisanik Isaksen Designimeersunik 30 procentinik akikillisanik pisisinnaasimapput.