Ateq "Nuuks Plads" tamanit nuannarineqanngilaq

Unittarfissaq Åboulevardip qanittuani Nuna tamakkerlugu toqqorsivissuup eqqaaniissaaq. Namminersorneq Nunatsinnut eqqunneqaqqammermat unittarfissap taama atserneqarnissaa siunnersuutigineqarsimavoq, tamaanilu kalaalerpaluttunik taaguuterpassuaqarpoq, soorlu Hans Egedes Gade, aamma Godthåbsvej, metrot pillugit suliffeqarfimmit nassuiaapput.

Aviisilli Politikenip nittartagaanik atuartartut arlallit tupigusupput - Nuuk Pladsimik taaguuserniarneqarnera quisaarutaanerluni - Københavnip aqquserngisa assiliorneqarnerat kiammita misissorsimavaa? Godthåbsvej illoqarfiup ilaani allarluinnarmiippoq, aqqusinersuarmit sisamanik aqqutitalimmit avissaaqqatinneqarluni, Jacob K. Nørrebromeersoq allappoq.

KNR-ip nittartagaani atuartartut aamma tupigusupput.

- Inuit qassit Hans Egede Kalaallit Nunaannut ullutsinni attuumassuteqartippaat? Aamma Godthåbsvej Nunatsinni Nuummut attuumassuteqanngilaq, nunaammulliuna maanna tammareersumut, Godthåbsvejimiissimasumut, taaguusiussaasoq, "Peter" knr.gl-imi allappoq, taanna isumaqarpoq unittarfissaq Landsarkivimik atserneqaruni naapertuunnerussagaluartoq.

Nuuks Pladsimik taaguuteqartitsinissamut isumassarsisoq Erik Willumsgaard, ima nassuiaavoq:

- Unittarfik Landsarkivimik taaguuserneqartussaagaluarpoq, taannali allamut nuuttussanngoriarmat, tamanna naleqqukkunnaarsimavoq.

- Ilimagaara Hans Egede amerlasoorpassuit Kalaallit Nunaannut attuumassuteqartikkaat. Sumummi allamut? Ilumoorpoq Godthåbsvej nunaammut peerutereersumut atsiussaammat - nunaalli Kalaallit Nunaanni Godthåb eqqarsaatigalugu immaqa taama atserneqarsimassaaq.

- Københavnimi kalaalerpaluttumik taaguusiinissarput kikkut tamarmik nuannaarutigissagaat neriuutigisimagaluarpara, tassami Stockholmsgade, Oslo Plads, Reykjavikgade, Thorshavnsgade aqqusinernut ateritinneqareerput, Erik Willumsgaard allappoq.

Metronut Københavnimi unittarfittaassaq, Nuup Pladsilu, 2018-imi naammassissangatinneqarpoq.