Atassutip siunnersuutaa akerlerinngilaat
Ilinniartut qanoq annertutigisunik taarsigassarsisinnaalissanersut aningaasallu suminngaanniit nassaarineqassanersut partiit isummerfigerusunngilaat.
Demokraatini ilinniartitaanermut oqaaseqartartup Anda Uldumip siunnersuut taperserpaa oqarlunilu:
- Soqutiginartupilussuuvoq siunnersuut eqqartussallungu.
Ilinniartut taarsigassarsisinnaanermut periarfissaqarnerulernissaat Siumup aamma tapersersorpaa.
- Soqutiginarpoq aamma pissanganarpoq. Imaasiinnarlugu itingartinneqarsinnaanngilaq, Karl Lyberth Siumumi politikkikkut oqaaseqartartoq oqarpoq.
Ilinniartut ullumikkut ukiup affakkaarlugu 6.000 koruuninik taarsigassarsisinnaapput. Atassutip siunnersuutaani takuneqarsinnaavoq taarsigassarsiat 1000 koruunimik qaffappata inuiaqatigiinnut 550.000 koruuninik ukiumut aningaasartuutaassasoq.
Demokratineersup Anda Uldumip naammaginngilaa Atassutip siunnersuutimini ersarissasumik oqaatiginngimmangu aningaasat suminngaanniissasut oqarlunilu:
- Atassutip siunnersuuteqarnermini tamakkua misissorsimasussaavai. Nunatta aningaasaqarnera isigissagutsigu misissorluaqqaarneqartariaqarami. Arlaannik qaffaagaanni arlaannik appaagaanni, periarfissat assigiinngitsorpassuugamik.
Naalakkersuisup oqaatsini Kalaallinut Danmarkimi ilinniagaqartunut uteqippai kaammattorlugillu kissaatigigunikku qallunaat ilinniartut assiginik periarfissaqarusukkunik qallunaat SU-annut qinnuteqaqqullugit.
- Danmarkimi ilinniartut periarfissaqarput SU-mut nuunnissaminnut nuunnerlu iluaqutissartaqarpoq Kalaallit Nunaanniit ilinniagaqarnersiutiniiginnarnerminngaanniit, taamaasilluta Nunatsinni ilinniartunut akissaqarnerulissuugut. Piffissani makkunani ilinniagaqarnersiutit iluarsaappagut, Ilinniartitaanermut Naalakkersuisoq Palle Christiansen oqarpoq.
Piffissami makkunani ilinniagaqarnersiutit taarsigassarsisinnanerillu misissorneqarmata Naalakkersuisoq Atassutikkormiut siunnersuutaannut itinerusumik oqaaseqarsinnaanngilaq.
Inatsisartunut ilaasortat Knud Kristiansen Siverth K. Heilmannilu siunnersuummik Inatsisartut ukiakkut ataatsimiinnissaannut saqqummiisuupput.