Atassutip siulittaasua sulinngiffeqarnissaminik qinnuteqarpoq
Aqqalup facebookikkut saqqummiussinermini Avannaata Kommuniani suliassani ilanngalaarumallugit nalunaarutigaa. Taanna juulip aallaqqaataanit qaammatini pingasunit sisamat tikillugit sulinngiffeqarusuppoq.
- Inuttut maannakkut suliassaqarama ilaqutariittut aqqusaakkat, imaannaanngilaarsinnaasut aqqusaareerlugit suliat ilanngalaarnissai piffissami aalajangersimasumi pisariaqarami. Taakkulu nukissaniffigeriarukkit, tuumeriarpallu suna tamarmi uterfigeqqittussaassallugu, KNR-imut oqarpoq.
Avannaata Kommuniani inuussutissarsiornermut siunnersorti, inatsisartunut ilaasortaq, Atassutip siulittaasua, Avannaata Kommunianilu kommunalbestyrelsimut 2017-imili ilaasortaavoq.
- Tassa oqareernittuut uani suliat ikilisaallalaarlugit maannakkumut taanna toqqarpara. Uani sinnerinut nikisitsisussaanngitsoq naatsorsuutigivara. Aamma uku kingusinnerusukkut aatsaat aallartittussaapput soorlu Inatsisartut naak maannakkut suliat ingerlalereeraluartut kisianni suliamma ilanngalaanginnarnissaat pingaartissimavara, Aqqalu C. Jerimiassen oqarpoq.
Aqqalu C. Jerimiassen kommunimut qinersinermi 267-init taaguunneqarpoq. Atassut Avannaata Kommuniani marlunnik kommunalbestyrelsimi ilaasortaatitaqarpoq.
