Atassutip naalakkersuisooqataalernissaa eqqarsaatersuutiginngilaat

Naalakkersuisoqatigiit Atassummik teknikikkut ukiaq suleqateqalerput, Siumullu kisiartaalluni illuatungiliuttunngorluni.

- Atassut siorna ukiakkut partiitsinnut saaffiginnissuteqarpoq teknikkikkut suleqateqarsinnaaneq apeqqutigalugu, tassalu Inatsisartuni annertunerusumik sunniuteqarsinnaanini siunertaralugu taamatut saaffiginnissuteqarluni. Uagut akuersaarparput isumaqaratta partii mikisunnguugaluarluni Inatsisartuni suleqataanermut peqataatinneqartariaqartoq. Ullumikkut suleqatigiinnitsinni tamanna toqqammaviuvoq. Naalakkersuisooqatigiinnermut tunngasunik Atassummik oqaloqateqarnikuunngilagut. Naalakkersuisuni tallimanngormat allannguereernerup kingorna, Naalakkersuisut siulittaasuat Kuupik Kleist taama oqarpoq.

Naalakkersuisuni ilaasortat akisussaaffii ilaatigut allanngortinneqarput, ilaasortalli allanngortinneqaratik.

Naalakkersuisunik allannguinermi Naalakkersuisoqatigiit inatsisartuni ilaasortaatitaasa akornanni arlaat naalakkersuisunngornissamik neqeroorfigineqarsimanersoq Kuupik Kleistip oqaaseqarfigiumanngilaa, Atassutikkulli ilaasortaatitaat siulittaasualluunniit Gerhardt Petersen neqeroorfigineqarsimanngitsut erseqqissaatigaa.

Atassutip siulittaasua Gerhardt Petersen ima oqarpoq:

- Peqataanngilagut, aamma aperineqarnikuunngilagut, tassami ukiaq isumaqatigiissuteqarnikuuvugut. Taanna suli atuuppoq, tassa ataatsimiititaliani ilaasortaaffissatut piumasavut pinikuuagut. Taakkualu maannamut naammagigallarpavut, Gerhardt Petersen oqarpoq.

Siunissarli eqqarsaatigalugu naalakkersuisunut ilaasortaatitaqalersinnaanertik takorloorsinnaanerpaat? Gerhardt Petersen ima akivoq:

- Tamanna takorloorneqarsinnaavoq, partiilli naalakkersuisuutitaqartut ilumut suleqatigisinnaanerivut siulersuisut takoqqaarusuppaat, Gerhardt Petersen oqarpoq.