Atassutip akileraarutit qaffakkusunngilai
Atassutip akileraarutinik qaffaanissaq isumaqatiginngilluinnarpaa.
Taamaammat sapaatip akunnerata tulliani Atassutip siulersuisuunerisa ataatsimiinnissaanni akileraarutinik qaffaanissaq oqallisissanut ilaanngilaq.
- Ataatsimut isigalugu akileraartarnerup qaffanneqannginnissaanik isumarput aalajangiusimalluinnarparput, Atassutip siulittaasua Finn Karlsen oqarpoq.
Taamaattorli akitsuutit qaffanneqarsinnaanerat ammaffigaarput, inuiaqatigiinni ajornartorsiutit akiornissaannut akitsuutinit isertitat atorneqassappata, Atassutip siulittaasua oqarpoq.
Naalakkersuisoqatigiit aningaasanut inatsisissatut siunnersuutaanni 100 millionit amigaataapput, taamaattuminguna taakku matussuserniarlugit naalakkersuisoqatigiit isertitanit akileraarutip qaffannissaa periarfissatut isigigaat.
Demokraatit akileraarutinik qaffaanissaq akerleralugu nalunaarutigereerpaat.
IA-p ilisimatitsissutigaa akileraarutinik qaffaanissaq akerlerinagu. Tassami partiip aningaasarsiaqqortuut akileraarnerusalernissaat kissaatigaa illuatungaatigullu ilaqutariit qassinik meeraqarnerat apeqqutaatillugu akileraarutinik oqilisaassiniarlutik.
