Atassutaalluartup Arkalo Abelsen taarserpaa

Naja Petersen 40-nik ukiulik, naalakkersuisunngorpat, naalakkersuisut ilaqutariinnut peqqissutsimullu politikkiat allanngornavianngilaq. Naja Petersenip suliat ingerlanneqareersut pilersaarutaareersullu aallaavigalugit sulinissani naatsorsuutigaa. Taamaalilluni partiimi Atassutip suliakkiutaanut naalalluni naalakkersuisunngorpoq.
Allattoq Jens Thorin
novembarip 07-at 2008 12:56

- Parteeqatinniit piukkunneqartarpunga, taamatullu alloriarnissara eqqarsaatiginngitsoortanngilara. Taamaammat suliassatut pissanganartutut unamminartutullu isigalugu qilanaarlungalu tiguara, Naja Petersen oqarpoq.

Taamaattorli ajornartorsiutit suut salliutillugit suliarissanerlugit oqaatigiumanngilaa.

- Tassa suliat ingerlareertut massakkumut killiffianniit aammalu pilersaarutaasut immaqalu suliassaajumaartussat aallaavigalugit sulinissara naatsorsuutigaara, suliassaqarfiullu taassuma suliassarititai uanga suliarissavakka, naalakkersuisunngorlaaq, isumaginninnermi siunnersortitut ilinniarsimasut taamatullu maannamut sulisoq, oqarpoq.

- Taamatut sulininnik pingaartittuaannarpara inuit atukkamikkut pitsaasumik sullinneqarnissaat, Naja Petersen oqarpoq.

Aasiaat kommunalbestyrelsianni Siumut, Atassut atsaviitsorlu ataaseq suleqatigiipput. Aasiaat Kommunianni borgmesterip, KANUKOKA-p siulittaasuata Enok Sandgreenip Naja Petersenimik kommunalbestyrelsemi suleqateqarnerminik naliliilluni oqarpoq, inuk qassiiliortuunngitsoq oqaaseqartorsuunngitsorlu.

- Kisianni suleqatiginera ajunngilluinnartumik ingerlavoq, uangalu suleqatiginera iluarisimaarpara, Aasiaat Kommunianni borgmesteri, Enok Sandgreen, oqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq