Atassut tunuaqqusivoq
Tusagassiuutinut nalunaarummi Atassut tunngavilersuivoq. Issuaaneq aallartippoq: Paasissutissat maannamut pigilersimasagut ersersitsipput attartortumiit piginnittuunermut aaqqissuussineq, innuttaasunut iluaqutaasussatut naatsorsuutigisaasoq, Naalakkersuisuni ilaasortaasimasut ataasiakkaat Namminersornerullutillu Oqartussani atorfilittat qaffasinnerit namminneq imminnut iluaqutissinniarsimanerisigut naapertuutinngitsumik atorneqarsimasoq.
Tamanna ATASSUT-mit akuersaarsinnaanngilarput, taamaammat inuit pineqartut qinikkatut sulisinnaatitaanerat tassunga killeqartariaqartoq isumaqarpugut, taamaammallu inuit pineqartut sakkortunerpaamik kaammattussavagut qinikkatut sulinerminnit tunuaqqullugit.
Inatsisartunut ilaasortanik tunuaqqusineq kisimi pineqanngilaq tassami piumasarineqarportaaq una, issuaaneq aallartippoq: Taamatuttaaq ATASSUT-mit piumasarissavarput Inatsisartut Kukkunersiuinermut Ataatsimiititaliaata misissuisitsinera misissuinerullu inernera tunngavigalugit akisussaaffimmik inissiisoqarnissaa naammassiniarlugu kinguarsaanertaqanngitsumik sulineq aallartinneqassasoq.
